見到個市咁醜樣，即刻睇下之前寫左乜先！好彩都係無睇好嘅。基本上9月都好難睇好，過去咁多年都係跌多升少，淨係講統計都易估。先Update個Risk on/off，依家又稍轉負數，但未見紅，即係負嘅程度未夠大，可能係橫行、回吐下之類，未至於大型下跌——雖然有人覺得依家咁樣都叫大型下跌。但呢樣野好老實，係睇你嘅timeframe係幾大，睇得細嘅，一晚都有幾個浪；睇過百年就永遠牛市。所以分短中長線係絕對必要，你係剝頭皮策略定係投資，個做法好唔同，投資嘅就搵啱嘅位儲。咁講嘅話，8月升浪黎講，大成交位大約係標普500 嘅5330點左右，到時可以試試佢，仲有70點左右。
至於仔細去睇個市，就應該睇呢個圈。非農就講緊失業率回落，符合之前講法，無左颶風就真係回返。但係留意返，個回落程度好細，睇小數點就係4.25%->4.22%，但係四捨五入就係4.3%->4.2%，聽落就有0.1%咁多，實際係0.03%。而新增職位亦係無預期咁多，預期13.9萬，開得7.4萬。仲有唔好忘記近期好多次都係最終要下修數字，今日話7.4萬，聽日又可能無左幾萬；仲要近年好多非農職位其實都係政府相關職位。大家應該好清楚，買股票就係買公司價值，公司價值就黎自佢嘅盈利能力同個金融環境（貨幣供應是否寬鬆）。私人市場就開始炒人潮，亦都無開太多新職位，啲新職位都係政府嘅。咁樣睇，個盈利能力會唔會上升呢？未必代表盈利能力下跌，但一定代表盈利能力唔係上升，即係100蚊買嘅股票返黎，佢咪keep住值100蚊囉（唔計金融環境，即唔理流動性）。
盈利能力唔再急升代表係喺個圈嘅咩位置呢？即係SLOWDOWN。呢啲圖都好經典，即係好耐歷史，但你見巴菲特其實都係咁做。上個月中先話佢成手都係T-BILL，即係Short-Term Treasuries，仲有佢買左Ulta Beauty。我google過下呢間公司，佢賣嘅產品有平有貴，藥房有售，好有defensive味道。以往衰退就會有所謂口紅經濟，平價奢侈品或者平價化妝品銷量會喺衰退期間上升，可能係真正貴貨買唔起，但又想令自己開心下，所以就買啲平價化妝品，等自己靚啲，心情都靚啲。所以我早幾期先講ROST、COST呢啲平價百貨、平價超市。但小心DG、DLTR，呢兩間好似俾PDD嘅Temu爭得好緊要。
港股就無乜好講，都話佢中意跟跌唔跟升。美股日股都跌到媽媽聲，港股都唔會缺席。一早同大家講過17472，連續兩日開市價17474.74同17469.96，除返2 = 17472.35，然後兩日都係陰燭。跟住今日碌穿埋今年中位數17250，暫時睇，橫行已經係最好結果。
Hengor's BLOG 