大市短評20240808
今次係咁易講講恒指先。
大家應該見到8月5號期指小時圖有枝大成交陰燭，呢種又可以叫垂直供應柱，高位係16917；如果轉返做日線圖，咁高位就再高少少，不過差唔到幾遠。大家可以咁諗，嗰一棍幅度大，成交都大，即係話嗰棍係掂到啲重要嘅供應區，一掂就大把供應推出市場；供大過求就跌，所以之後去過幾次呢個位都要縮縮。
你可能問，尋日下晝同夜期唔係升穿過咩？首先講夜期，夜期唔使現貨配合，佢想升到177都得架啦（收市價正負5%）；大家記唔記得幾年前有次夜期突然夾左千幾二千點，然後急縮？庄家真係好鬼馬。
至於尋日下晝，你見同一棍有上影線，成交又唔大；甚至你可以見到期指成交由星期一開始就縮緊落去。所以嗰一棍唔構成威科夫理論（Wyckoff）嘅SOS（sign of strength）或者JOC（jump over creek）。
我唔會樂觀或者悲觀，分析只可以客觀。目前黎講，下限165上限169，唔走出呢個框框都係橫行，無乜特別。又或者咁講，佢即刻升返更唔係好事，庄家要喺橫行區收籌（或者派貨），唔畀啲時間佢，升都唔升得耐。
至於外圍情況，暫時都係睇yen同美債。日央行副行長內田真一已經出黎un固固，USDJPY應該暫時安全。不過大家睇圖見到，前面有成交密集區喺147.85呢啲位，結果尋日yen貶返去147.9就升返啲，密切留意142.3到147.9呢個range。
美債嗰邊就拍賣得唔好，10年yield升返去3.9%。除左國債價跌，公司債價都跌左，甚至跌得更多。呢個亦即係我講嘅LQD/GOVT大法，兩者相除就移除左「債價下跌」呢個共同因素，得返「風險胃納」呢樣野。似乎依家繼續借經濟衰退黎做淡，留意會唔會穿底。如果唔穿嘅，之前炒家套現左嘅資金都要搵野買下，依家連10年債又話唔買，除非舊錢去左還錢，開始去槓桿。但好似唔係好留意話去槓桿，啲新聞都係講緊衰退同戰爭風險。
Hengor's BLOG 