以下內容有劇透，唔想劇透就bookmark 左篇文之後好走喇。
其實我就唔係尋晚喺文中睇首映，而係早過首映已經喺高先戲院睇左，所以多謝GoldenScene！Btw，之前一路都無喺自己Blog 寫戲，因為通常會喺策略王電視——午市有戲派時段講戲，但係今日紅日，所以轉場上黎講！
先講講整體部戲，然後再講「共業」呢個話題——呢樣就高級佛法呀。
我喺唔同地方講過，我認為藝術係兩件事嘅結合：Entertainment＋Enlightenment，我又叫佢做兩個E。娛樂性方面，呢套戲係唔錯嘅，兩條時間線交替穿插，一層一層剝開洋蔥，觀眾就好似譚哥演嘅龍sir咁，一路追查，終於知道係邊個要炸巴士同點解要炸巴士，係有追看性嘅。而如果大家有睇邱博士其他電影，都會見識到佢啲閒角都好好笑嘅，例如《伊波拉病毒》會有路人講「柒撚懵懵食甜筒」嗰啲lol。今次當然最好笑係麥東同專家Dickson嗰兩段啦，AK追還錢嗰段都好笑嘅。尤其係麥東嗰段完美復刻的士佬大戰巴士佬，笑到仆街，Herman同的士佬係咪有仇，哈哈哈。
至於講到啟發/訊息，網上唔少人都話今次Herman Yau 有火。老老竇竇，如果以為邱禮濤淨係拍啲商業搵食戲嘅，咁真係好打有限。邱博士其實拍啲人文關懷、社會性、人性嘅戲係更加好嘢，好嘢到將黃秋生拍成首席癲佬，《八仙飯店人肉叉燒包》、《伊波拉病毒》、《的士判官》（都話同的士佬有仇！）。仲有唔可以唔提《等候董建華發落》，佢都係奇案導演呀。《我們不是甚麼》都可以話係奇案電影，故事原型係武漢巴士爆炸案，都係講一對同性戀情侶報復社會，於是變成炸彈人，同巴士乘客一齊炸死。
講返套戲，主角方面，AK 同Ansonbean 分別飾演嘅係暉仔同Ike，仲有譚哥演嘅叫龍sir，做鑑證嘅。佢地都係充滿傷痕嘅人，甚至唔止佢地，AK老母李蕙敏都係（戲入面唔係叫李蕙敏；演出令人印象深刻，勁），牙Thor 都feel 到係，甚至龍sir 老婆彭秀慧。Well，數數下，全套戲個個都多多少少唔健全，只有程度分別。
呢個係好睇嘅地方，充滿傷痕嘅人去到極限會點做呢？呢個亦係我最想講嘅嘢——共業，正如暉仔同Ike 房門後面寫嘅：「當雪崩的時候，沒有一片雪花是無辜的。 」基本上，係無可能講得出兩位主角因為邊一件事而決定要炸巴士——擴大性自殺。暉仔俾老竇袁富華侵犯？Ike俾老竇陳淑儀趕走？定係俾人拖糧、走數、窮、俾茶記老闆壓榨、中左HIV、俾人話死基佬？每樣野都唔係，同時每樣野亦都係。
喺呢套戲入面，可以睇到一個更真實、更高級版本嘅「善有善報，惡有惡報」。誠然，善惡有報係真嘅，但更加高級嘅睇法係，善果惡果都唔一定報返落行善者、行惡者身上，而呢個先係世界嘅隱密法則。社會就似一張網，共業系統會記錄呢張網發生嘅所有事情。你喺其中一角拉扯個網，就會向共業呢個系統輸入能量，能量係不生不滅嘅，會喺呢個網上面波動、傳送。亦即係話，有人喺呢個共業系統輸入善因，總會有人獲得善果，輸入惡果，就會有人獲得惡果。咁呢樣野同套戲有咩關連？唔同嘅人向呢個系統輸入惡意，最終催生左惡魔，Boom，炸死嘅卻唔一定係本身作惡嘅人。暉仔同Ike 不斷接收呢個系統其他人所輸入嘅惡意，最終決定要攬炒，但係其中一個死嘅人係Ike 大左肚嘅家姐。Ike 甚至喺作案之前將「遺產」交晒畀家姐，明明家姐係佢最鍚嘅人，但係呢個就係共業系統殘忍而公正嘅法則：你無辦法控制到受眾，唯一肯定嘅係，惡因會帶黎惡果。
呢排戲院重映《進擊的巨人The Last Attack》，我覺得艾倫發動地鳴呢件事同暉仔、Ike炸巴士都有相似嘅地方。有瑪萊人都話，係因為佢地一直將恨意灌注落帕拉迪島，所以地鳴成為左佢地嘅報應，地球有八成人口被巨人踩死。而發動地鳴嘅艾倫同樣係無能力避開佢本身救嘅細路。共業係無眼嘅，惡因會以隨機嘅方向一直傳遞，直到有人承受惡果為止。呢個唔係公唔公平嘅問題，而係法則嘅問題，正如你唔可能話物理學唔公平。
咁咪好絕望？不是。我覺得呢個就係Herman 溫柔嘅地方，戲入面有佢嘅解藥。其中一段我好鍾意嘅係Ansonbean同牙科解釋畫畫嘅藝術概念，然後牙科話：我都唔知你講乜，不過我想支持下你。（唔記得係咪exact wording啦）。各位，呢個唔叫無條件嘅愛，咩叫無條件嘅愛？我唔明白你，不過我愛你。（其實暉仔都係咁，呢頭話唔明Ike 講乜，嗰頭做左人男朋友）。正如頭先講，個系統記得所有野，其實只要善因多過惡因，惡果就會輕啲，可惜呢種愛唔夠多，暉仔同Ike始終都係要化為眾人嘅惡果。另一邊廂，彭秀慧嘅愛就阻止左譚哥炸差館——而善果當然都係無定向，彭導種嘅善因，成為左朱柏謙無被炸死嘅善果。我唔明白你，不過我愛你，係不含judgement 嘅愛。點為之唔judge？我唔明你點解會鍾意搞基，但係我尊重你嘅自由；你係呃左我，但係我願意畀機會你。
所以我覺得，呢套戲唔止有控訴，唔係單純嘅有火，我覺得係充滿對弱勢嘅關懷。佻皮啲講就係：想底層唔做張獻忠？多啲向社會注入愛，少啲同人爭拗。佛法啲講：共業無眼，人人種善因，社會就好；人人種惡因，社會就敗壞。喺現實嘅應用例子係，呢個又話唔知要有牌先熄得警鐘，嗰個又話雖然我無牌，但係上面叫我做；每個人都向個社會傾注惡因，惡果總有人承受。但係如果人人向善，而且心知種善因唔一定係自己受善果都仍然肯行善，就會好似牙科最尾買嗰幅畫咁。牙科買唔到AK打波幅畫，於是揀左示威者分紅海讓路畀救護車幅畫。呢幅畫係好好嘅現實例子，受善果嘅病人或者傷者斷唔可能係所有示威者嘅親人，但係人人都願讓路。香港之所以係福地，我諗原因就係咁。
聽聞Herman 受訪問嘅時候話，佢諗法入面嘅BL 係Beyond Love。的而且確，我覺得套戲關心嘅唔止係同性戀，仲有善意惡意、人性官僚嘅討論。
Hengor's BLOG 