話說月初收到讀者email，後來又有朋友話想睇，所以我就照寫立春奇門預測啦。玄學並非精密科學，純粹係徇眾要求（兩位！），寫一寫畀大家參考一下。亦都會用到呢位讀者嘅見解去解盤，到時大家可以驗證一下，到底係咪真係咁堅！(唔想睇「丙午」解釋嘅，可以直接跳去後面睇解盤)
解盤之前，先講講「丙午」流年。到底丙午年會帶黎乜野意象呢？一般而言，流年帶黎意象，係指干支同自己日主性質會起咩作用。例如，日主天干係壬嘅朋友，丙午年所發生嘅事情，主要就圍繞住財富，因為火係壬水嘅財星。用呢個角度去做一做天人感應——即係用靈感去斷估，我地會得出咩結論呢？
首先，我認為代表住人類社會嘅性質應該係土，尤其係己土。何以故？不論中西文化，都有傳說指神明用泥土造人，例如女媧用泥土造人、《聖經》話神用泥土造人，諸如此類。所以睇丙午流年有咩事發生，應該睇火作用於土會有咩事發生。
對土黎講，丙午有齊晒正印同偏印，而且係好強大嘅印星，因為干支都係屬火。印星其中一個解釋係知識，正印就係正統嘅知識，例如係學術方面；偏印就係偏門知識，例如係宗教同神秘學等等。由於午藏丁，同丙屬於唔同嘅陰陽，所以對於土黎講，必定係正偏兩印都齊全。換言之，2026丙午年，正統同偏門嘅知識都會好發達，尤其係與火相關嘅知識，亦即係AI囉，火係資訊、科技、文化、美麗丫嘛。總之所有同火有關嘅正統知識，除左AI之外，一切科技、能源嘅知識、技術都會好發達。當然，偏門嘅知識，都會好盛行。離卦中虛，所以講究空虛、虛無嘅偏門知識，即係身心靈、宗教都會好發達。想開發side hustle 嘅朋友都可以以呢啲主題為目標去做content。值得注意嘅係，火太旺，怕物極必反，同火相關嘅正偏知識都可能失控，所以AI行業可能引起社會問題(導致泡沫爆破？)，又或者身心靈騙子橫行。
正偏印星亦都可以解做學者(正)和宗教界人士、藝術家(偏)。今年正偏印皆旺，應該以佢地為主角。正面嘅可能係有啲學術突破，但係負面嘅就可能有重大醜聞。火太旺，呢幾個界別出現醜聞一啲都唔奇怪，睇下Epstein files 就知。
然後我地再感應一下，到底丙午火旺，對社會、經濟仲有咩影響。如果人類整體係土，咁火太旺，對火就唔係最差，反而土同水會好差。例如一個人，日主係己土，火太旺，火焦土坼，反而可能水(腎功能)同土(腸胃、皮膚)差，而且唔係陽太盛，反而係陰盛陽虛，可能要食金匱腎氣丸(真係有事就睇醫生啦)。用呢個角度去切入，今年水同土所代表嘅行業都可能差啲，而火克金，金亦都可能較弱。咁就麻煩，股市性質本身就係土、金、水，有土嘅誠信，金嘅規矩、institution，水嘅交易流動，所以整體股市相信都會偏弱。
另外，地球亦都係土，主要係岩石嘅星球，上面有水有樹木，入面有金屬核心，有火(熔岩)。猛火作用於土，生唔成，反為變左好似克咁。同上面分析一致，火太猛，最主要反而傷害水土，然後係金。所以丙午年睇落火旺，反而水災同地震會更加頻繁，因為火猛傷左地球「脾胃」同「腎陽」，會成日搞肚痛(地震)，甚至肚瀉屙水形成海嘯。金即係肺同大腸，大腸肚痛講左，到肺嘅問題，今年空氣可能都較為混濁。天人感應一下，會唔會就係火山爆發(丙午火)，一方面噴發有毒氣體(金)，另一方面引發地震(土)同海嘯(水)？風災(木)可能反而無咁嚴重，相對黎講。
依家正式開始解奇門盤。
香港係1997年7月1日回歸，即係丁丑牛年，年命就係丁。我地首先睇丁干飛去巽四宮(左上角)，同宮見景門、天芮星、辛加癸。具體係乜我就唔解喇，自己查一查癸寄巽四宮，同埋天芮星係咩意思。
我事前設定左一套計分標準為每個宮位評分，所以以下會好快直接講結論，以12分為界線，大過12分為小吉，大過40分大吉，細過或等於12分為小凶，細過-22為大凶。
庚寅月(2026年2月4日至2026年3月5日)：14
天盤庚落兌七宮，寅就睇艮八宮，總分14分，稍高過12分，但力度唔大，可能係跌完彈或者升完跌，總之唔係大走勢嘅玩法。
辛卯月(2026年3月5日至2026年4月5日)：18
天盤辛落巽四宮，卯就睇震三宮，總分18分，高過12分為稍吉。同樣力度唔大，主要係得益於景門(火)同巽四宮(木)相生，可能有得微升，但唔似係創新高。
壬辰月(2026年4月5日至2026年5月5日)：4
天盤壬落坎一宮，辰就睇巽四宮，總分4分，比平均分12低左8分，小凶黎講都幾凶，睇個款都唔開胃。結合讀者來信指出嘅規律，生門可能令走勢係先升回跌。
癸巳月(2026年5月5日至2026年6月5日)：11
天盤癸落艮八宮，巳就睇巽四宮，總分11分，比平均分12稍低。壬辰月跌完一跌，本月可能回一回氣，但都唔係大升，甚至微升都唔算係，可能係稍為回穩，整體偏軟，受傷門拖累。
甲午月(2026年6月5日至2026年7月7日)：3
奇門遁甲，顧名思義，盤中無甲，而甲午遁於辛，所以我地用辛黎代替。天盤辛落巽四宮，午就睇離九宮，總分3分，遠低過平均分12，仲差過壬辰月。可能係死門受離火所生，呢個月應該跌唔少。
乙未月(2026年7月7日至2026年8月7日)：-5
天盤乙落離九宮，未就睇坤二宮，總分-5分，係今年第一次出現負數嘅月份。又死門又驚門，我諗都係跌嘅多。
丙申月(2026年8月7日至2026年9月7日)：7
天盤丙同地支申都係睇坤二宮，總分7分，都係比平均分12低，都係跌嘅機會較大。
丁酉月(2026年9月7日至2026年10月8日)：-1
天盤丁落巽四宮，酉就睇兌七宮， 總分-1分，又負分。不過見到開門為吉，可能中間有一波回升，最尾都係要跌。
戊戌月(2026年10月8日至2026年11月7日)：41
天盤戊同地支戌都係睇乾6宮，總分41分，超越大吉線！值符係領袖，八神當中最吉利；乾宮屬金，生休門屬水，使吉門更吉；戊加丙亦都係大吉格青龍返首；天任星屬土，生旺宮位。美中不足嘅係呢個宮位戌亥雙空亡，戊同丙亦都入墓於戌。但係世事無話完美，呢個宮位已經有好多好意象，整體都好好。可能係前面已經跌得太金，跌到年尾都係時候要升返轉。
己亥月(2026年11月7日至2026年12月7日)：32
天盤己落震三宮，亥就睇乾六宮， 總分32分，雖然未到達大吉，但係都遠高過12分，應該都會有比較明顯嘅升勢。
庚子月(2026年12月7日至2027年1月5日)：9
天盤庚落兌七宮，子就睇坎一宮， 總分9分，稍低過12。前面升左兩個月，今個月都要回一回。但係有開門、生門嘅吉氣，個市未必太弱，或者又係聖誕前夕有得升，一月返黎跌返下咁解。
辛丑月(2027年1月5日至2027年2月4日)：13
天盤辛落巽四宮，丑就睇艮八宮， 總分13分，稍稍高過12分，個市可能磨磨下，唔係超差，但有傷門睇住，好極有限。
總結：
寅月稍好，卯月稍好，辰月差，巳月稍差，午月差，未月好差，申月差，酉月好差，戌月勁好，亥月勁好，子月稍差，丑月稍好。
七個月差，五個月好，而且中間係連續六個差月，年頭兩個所謂好月都只係好少少。不過有危有機，戌亥月嘅升勢應該就係前面跌出黎嘅，8、9月似乎可以慢慢買下野，等10月爆。
睇下黎緊係咪真係辰巳午未申酉，即4、5、6、7、8、9月跌到懷疑人生先。
Hengor's BLOG 