睇到潘焯鴻之流話前FBI 局長被捕係以言入罪乜乜乜
的而且確，有部分睇法係覺得言論自由應該去到極致，係乜都講得，誹謗、恐嚇嗰啲都唔應該阻止
但我諗大部分人都未進步到咁，點都會有野覺得唔講得掛。
科米（James Comey）因為喺Instagram 上載左幅圖，上面用貝殼砌左「8647」字樣，被控係呼籲暗殺特朗普咁解。首先，特朗普係47任美國總統，47自然代表佢。然後，86喺俚語入面有get rid of, cancel 嘅意思，亦有人話係諧音黎，eight six 即係代表execute 前面2個音節。
咁呢個係咪最惡劣嘅以言入罪？科米係前FBI 局長，唔係話俾人聽唔知咩叫俚語咁搞笑呀？咁傻咁天真？如果係遊客影幅咁嘅相，我諗都解得通，唔係全世界都係美國人，就算我識英文都未必知86 喺美國點解。但係一個美國人，兼且之前份工要對住無數恐怖份子、罪犯，同人講唔知咩係86？
情況等於喺香港某個沙灘，有人用貝殼砌左4隻大字「隊冧KC」，一個外國人影低擺上IG 就當然可以辯稱根本唔知咩意思啦。但如果你係香港人，你可唔可以狡辯：「我點知咩係隊冧？唔係隊佢飲酒搞到佢醉咩？」即係咁講，因為咁而俾人拉，言論自由最忠實嘅支持者應該都係覺得有錯嘅，但我諗大部分人都覺得好合理啦下話。
反而邊樣野先係踐踏言論自由呢？白宮批評穆迪評級呢單野就係嘞。老老豆豆，穆迪遲過標普同惠譽將美債降低評級，都叫做仁至義盡啦 lol，講緊比行家遲左十年以上。評級機構有佢自己方法論去評價金融資產，你可以質疑個方法論，咪攞黎討論囉，標準無話絕對家嘛。但係白宮依家話穆迪係阿侵嘅政治反對者，將呢種意見嘅表達上升到政治立場嘅對立。
嘩屌，做左你政治敵人，咁會點呢？你呢個處理係咪恐嚇緊人呢？咁以後係咪有乜野唔受歡迎嘅意見都唔可以提出呢？科米單野一係有陰謀，一係佢真係on99，呢種言論自由保障黎都無乜用；但係穆迪呢單野我覺得係重要好多，言論自由某程度上係保護呢種不受歡迎而又有用嘅言論。呢類言論、意見（唔係單單講穆迪今次評級）有時可以激起公眾討論或者政策上面嘅轉變，唔啱聽嘅野有時係要有人講，然後一齊去改。你淨係誇誇群，有乜意思呢？
Hengor's BLOG 