最近有觀眾朋友問過我批唔批流年，當時我就話無做開啦。不過後尾我同另一個觀眾朋友批命順便批埋個流年，亦都同自己批左，咁我就用自己個流年運程去示範下，究竟係點批。
成件事好似紫微斗數咁，有十二宮位，分別係命宮、父母宮、福德宮、田宅宮、官祿宮、交友/僕役宮、遷移宮、疾厄宮、財帛宮、子女宮、夫妻宮、兄弟宮。排好宮位之後，我就拎副易經牌出黎抽，順序由命宮開始擺，然後順時針擺到兄弟宮*。
以上就係我乙巳年流年運程，結果係：
命宮—火地晉；父母宮—水雷屯；福德宮—地水師；田宅宮—雷澤歸妹；宮祿宮—火風鼎；交友宮—水地比；遷移宮—天山遁；疾厄宮—火山旅；財帛宮—水火既濟；子女宮—水地比；夫妻宮—巽為風；兄弟宮—雷火豐。
我略略解下。命宮代表整體2025乙巳年運勢，見到火地晉，算係幾吉利嘅卦；不過會係吉利得滯，機遇非常多，但係好難掌握，有種「吃不消」嘅意思。最近幫個觀眾朋友喺子女宮抽到火地晉，跟住佢同返我講原來佢有三個小朋友；另一個觀眾朋友都係抽到火地晉，原來佢之前舊屋兩房，但係有兩個小朋友，唔係好夠住。所以大家見到嘞，其實火地晉唔差，但係有啲吃力，啲野好似衝埋黎咁。
然後就順住一個圈咁去解牌，咁我就唔一一解釋自己嘅牌嘞，因為有啲例如父母宮，你知我阿爸**嘅狀態都對你無乜營養；但如果八卦嘅，都可以Google到啲牌大至上點解。所以簡單講：
父母宮講阿爸嘅情況多（阿媽去左兄弟宮多，睇下面＂*＂解釋）
福德宮講內心世界、情緒，田宅宮就講居住環境、會唔會搬屋
官祿宮講事業、有無職升
交友宮講朋友、同事
遷移宮講出行好唔好
疾厄宮講身體狀況、邊度容易出事
財帛宮講錢
子女宮講仔女或者下屬
夫妻宮講感情生活
兄弟宮講兄弟同阿媽
睇完一圈牌嘅解釋之後，如果有野想仔細問，例如關心錢財、感情，或者想知移民好唔好，咁就可以針對對應宮位，抽多兩張牌，一張係「過程」，一張叫「結果」。我呢啲咁膚淺嘅人，當然就為左財帛宮再開兩張牌啦。本身水火既濟係靚牌，代表「完成」嘅意思，即係「掂」；但係易經觀點係，啲野係循環，衰完就好好完就衰，所以水火既濟係吉中帶凶，有掂完之後開始散嘅意思。咁我見自己財帛宮係掂完就散，就想知多少少細節，睇下有無得救，於中間見到我抽多兩張牌，過程係雷風恆，結果係兌為澤。就咁睇圖畫，睇落去都好正面；不過大家仔細睇，兌為澤係啲小朋友跑得好開心，代表係小朋友（唔成熟），玩玩下。換句話講，點解會係既濟，掂完就散？可能係警告我，話我會將賺到嘅錢拎去玩（娛樂開支大），所以剩唔到錢；又或者係賺到錢返黎，處理得唔成熟。既然依家我預早知道我有呢個傾向，可能會對賺返黎嘅錢唔認真，咁我就有機會改變個命運，趨吉避凶。
跟住，我地可以對關心嘅宮位，攞佢元素出黎做分析。例如睇返整體運程，命宮係火地晉，我地抽佢元素出黎，上卦係火，下卦係地。然後我地就睇下其他宮位，有無上卦係火？有無下卦係地？如果有，咁嗰個宮位發生嘅事情，就好有機會同所關心嘅宮位有關（呢個例子係命宮）。睇返我上面幅圖，上卦係火嘅有官祿宮（火風鼎）、疾厄宮（火山旅）；下卦係地嘅有交友宮（水地比）、子女宮（水地比）。事業係火風鼎，可能叫我要拜多啲神；火風鼎本身唔差，不過怕啲野好似幅圖咁，變成輕煙。咁成件事個解釋可能係咁：事業機會多，但係最尾十樣有六樣化煙（無左），所以導致命宮火地晉，機會雖多，但唔係樣樣把握到。水地比同合作有關，出現喺交友宮同子女宮，可能代表今年好多人會同我合作，甚至同我合作嘅人都變埋好似下線咁（子女/下屬）；呢樣野亦可能係火地晉機會多嘅原因。至於火山旅？可能話我機會多，有時可能要出trip搞到有病？似係食錯野攪肚痛，因為火山旅嘅山係艮為山，屬土，代表腸胃。睇黎要買定多啲保濟丸！
整體黎講，我對自己流年運程都幾滿意，起碼係話機會會多到把握唔到，而唔係話無機會。機會嘅野有好過無。
*兄弟宮好多時都當係媽媽。道理係，命宮逆行兩格就係夫妻宮；咁如果阿爸喺父母宮，父母宮逆行兩格，關係上咪就係阿爸嘅夫妻宮？而父母宮逆行兩格就係自己嘅兄弟宮，所以有時，兄弟即係阿媽。
**講起我阿爸，佢做小型工程（鋁窗檢查）、裝修嘅，大家有裝修或者驗窗嘅需要，記得call 我。我阿爸一向收得好平，所以仲未發達，靠大家幫幫手嘞！
Hengor's BLOG 