又拎返盞燈出黎睇睇先，依然係綠燈，美股走勢依然唔錯，少少回落唧，仲係高過原先高位5669.67，即係喺個箱頂。
再實際上望下LQD/GOVT幅圖，唔單止高過年內高位，仲高過上年12月14號嘅高位。上日GOVT微跌，即係債息整體微升，但係與此同時公司債有得升，即係大家仍然肯take risk。
不過留意返，上星期五三巫日結算完之後，波動應該會擴大返，唔會好似上星期五咁chok chok下就完。宏觀方面，息就減左，日本央行嘅決定亦都一如預期唔變住，亦即係本身price in 左嘅野無乜變化。我諗要好似日央行行長植田和男咁講，條件合適就會加息嘛，咁下次真係加先算，暫時唔會有咩波動住。咁目光又轉返黎美國本土喇，星期二好似會拍賣2年期國債，睇下賣成點，仲有下月初嘅非農。11月減0%、減0.25%定減0.5%？又要睇就業市場了。
相比之下，恒指好似仲有活力過美股，幾難得。學英sir話齋，美股就成日要研究佢硬著陸定軟著陸，港股就簡單，就係硬著陸啫。硬左咁耐，美國一減就減兩碼，當係久旱逢甘露，點都係好事。睇圖形係個W，幾靚仔添。上次都話有望188xx，睇下今個星期到唔到埋。不過咁講，呢轉升得快，恒指隨時唔生性要回下。
咁就好似之前咁講，地產股係唔錯嘅。唔係話減息就令好多人買樓啦，但係減息至少可以舒緩啲債務開支。都係嗰句，買股票即係買間公司嘅賺錢能力，成本低啲咪賺多啲錢。依家外部條件令成本降低，咁仲唔好左？不過要記得，個環境唔係真係咁好，睇型態要隨時識走，例如指數見188xx，或者10月頭出非農之後如果見無得再升，咁就走喇。
Hengor's BLOG 