先Update Risk On/off指標，繼續綠燈。呢個證明左點解要睇呢啲指標。雖然我話中期個市可能會有憂慮，但係我成日都同大家提《The Big Short》，就算你睇佢千瘡百孔，就快要冧都好。個「就快」係幾時？股市係人玩嘅遊戲，人就有唔同嘅睇法同欲望，咁就有動機去做手腳、發放唔同嘅資訊，大家見到連＿博都成日放流料*。與其去估個「就快」係幾時，不如一步步睇住市場其他人做緊乜。你未必知佢地點解咁做，點解減兩碼息會沽債呢？唔使知，總之件事係咁，國債個價就跌，但係公司債就升，反映大家好願意take risk。當然，事後要解釋實有原因，其中原因包括聯儲局主席鮑威爾強調唔會停縮表，亦都叫大家唔好預佢次次都減0.5%。即係話本身大家蜂擁去買債，買得過量左咁解。
講返轉頭，點解今次減半厘咁多？今朝睇Byron Tsang個post提醒左，大選係11月5號，而下次聯儲局開會就係11月7號，咁個時機就可能解到今次要減半厘。大家諗下，依家大選投票越黎越多人用郵寄，點票爭議分分鐘搞一輪，點完又要再點，可能到議息結果出之前，總統選舉結果都未出。咁如果係個有可能混亂嘅情況下減半厘，而9月係減1/4厘嘅，咁可能令市場感到不安。而今次減半厘，都仲可以理解做10月無議息會議，所以當係9月減埋10月嗰份，睇落就變得平均好多，原來都係1個月減1/4啫。當然，呢個一方面係估，另一方面呢個動機估黎好似無乜意思，分享下咁解。
Anyway，頭先都提到，市場目前比較肯take risk，之前資金流入去嘅防守型服票都有啲回吐，好似WMT咁。不過咁講近日超買太勁，回下都正路，如果大家係做資產配置嘅，應該唔使點理。短炒就淨係留意LQD/GOVT就得，亦即係睇住我個update。
Share埋呢幅圖畀大家。點解拎01同07年出黎講呢？呢兩次都係減半厘，其他首次減1/4厘嘅情況就正所謂個別發展啦，亦都唔符合今次減半厘嘅情況，減半厘係應該同減半厘去比較的。咁睇嘅話，大概仲有一個月玩。
再睇返港股，個樣幾靚仔，整左個W出黎，睇黎可以上望188XX。學伕之前話齋，就算啲野唔夠信心，地產股都無問題嘛，你睇16、17嗰啲幾澎湃。不過小心，上證唔係好郁得到，得港股有啲力水，而港股短期都升唔少，下星期返黎回下都唔奇；亦都可能見188先回。咁即係話策略上可以分批走。
*費事俾人話啦，但近日有睇新聞都知係邊間啦
Hengor's BLOG 