今次一開波當然要講聯儲局啦，事實上你今日睇到嘅分析或者評論，九成九都係講聯儲局架喇。減0.5%呀！半厘呀！點解呢？聯儲局主席鮑威爾就話，依家經濟好好，今次嘅決定係為左維持現狀。鮑sir補充，依家經濟穩健發展，通脹亦更加接近2%目標，而勞工市場亦都好健康，所以今次決定減息係為左保持今日嘅經濟強勢。為左達成呢個目標，仲會隨住時間繼續減到去更加正常嘅水平。
老實講，呢個講法最多係解得通減息呢個決定，但似乎解唔通個幅度點解係半厘。如果好似鮑sir咁講，美國經濟強勁，勞工市場亦好健康，咁點解唔係減025%？你唔驚一減減咁多，通脹又升返上去咩？你唔試探下個市場？如果真係咁健康，減0.25%應該都保持到強勁嘅經濟下話？如果真係咁勁，應該話唔減都應該無事，不過見通脹已經接近目標，所以就開始恢復返正常水平。但係依家一減減半厘，係咪即係用啲models（excel嗰啲，唔係會去船P嗰啲）計過，依家個情況係減半厘都唔怕會刺激個通脹向上？
咁依家可以睇兩個scenarios，一係個環境其實真係惡劣到急減半厘都唔會通脹重臨，咁即係似瀕臨衰退嗰種減息，而呢種減息通常都係會跌市。另一個scenario係，減半厘令通脹重臨，結果FOMC一至兩個會議之後又話要加返息，咁個市場就更動盪，因為本身聯儲局係預期今年仲要減多半厘。呢兩種情況都係指向淡嘅。當然，仲可以理解做今年預減1厘，10月無會議，所以9月一口氣減半厘當係減埋10月嗰份。但都係嗰句，依家啲經濟數據牌面上都未至於咁差，點解唔試下個通脹反應先呢？定係覺得試都費事，直頭覺得自己已經減遲左，應該7月已經減？
Anyway，同上篇講法一樣，諗法還諗法，做法要跟返住啲指標，始終就算覺得佢黎緊大冧都好，都可以唔係即刻冧，永遠要緊記《The Big Short》個故事。不過亦都要記得好少一減減半厘，對上兩次直減半厘，一次係科網股爆破，另一次係金融海嘯。既然要睇指標，就留意Risk on/off喇。尋日仲係保持綠燈，暫時可能都安全，不過個指標有啲滯後，可能未反映得晒急減半厘嘅反應，所以你見個綠棍短過上日。
至於港股就上到VWAP同17472樓上，睇下keep唔keep到兩日。就算無東升西降，至少地產股應該會做得唔錯，話晒減半厘。
Hengor's BLOG 