先update Risk on/off，尋日直頭轉返綠燈，即係正數嘅幅度夠大。大家睇到，美股比較強，前面就算有啲負數，但係只要唔轉紅燈就唔使走貨，灰燈嗰段日子依家睇返只係算橫行。喺議息之前轉綠燈，分分鐘出結果之前標普都創新高；道指就已經造左新高嘞。
今個星期當然就係關心議息同議息，一個議息係聯儲局，另一個係日本央行（英倫銀行就算啦）。不過照計日央行今個星期五應該唔會加息住，但有機會12月加；另一邊廂聯儲局減就減硬，問題係減幾多呢？依家FEDWATCH顯示，減0.5%嘅機率高過0.25%，而個市無跌，即係個講法又有少少改變。大家猶記得之前主流係擔心減太多係咪代表聯儲局驚經濟衰退呢？但依家就係吹緊要減咁多，但個市都唔跌，即係似乎已經接受呢個水平。咁所以又掉返轉，如果只減0.25%，係咪會令市場失望，跟手要跌呢？但如果減0.5%，然後日央行12月加0.25%，咁美日息差咪至少減0.75%？仲未計聯儲局喺12月又會唔會再減呢？雖然話上次拆倉已經拆左一半，所以今次USDJPY去到140，美股都升返上頂，但係個息差收窄得咁快，似乎有啲隱憂。
不過又咁講啦，呢啲憂慮唔足以構成大舉造淡，你細細注就無乜所謂。大家永遠要記得《The Big Short》套戲嘅教訓，就算你見到個危機已經爆左，只要庄家話唔爆住，個市就係唔爆住。所以依家個市，係呀，成交量少左11%，但係大家話佢要升，佢就升。呢一刻大家要當呢個係音樂椅遊戲，或者係一個扮傻遊戲，要好清楚知道自己扮緊傻，陪大家一齊傻，到勢色唔對就開始清醒，而呢個扮傻過程可能好長。呢個就係點解要睇住LQD/GOVT嘅原因。
恒指期貨方面，近排高位8月30號拉個VWAP落黎，今日就升左上去，睇落幾好。不過留意呢幾日無北水，成交好少。牛熊街貨本身就牛多過熊，而今日現貨升穿176又殺一堆熊證。但我覺得比較小心好啲，始終一賭就係賭個中秋節同埋議息，星期四凌晨出議息結果嘛。Anyway，中秋節快樂！
Hengor's BLOG 