Update Risk On/off，保持正數之餘，條數都改善左少少。尋晚LQD同GOVT都跌，即係其實公司債同國債都跌價，但國債跌多啲。似乎大家比較願意take risk借錢畀公司，但係喺國債度套啲錢出黎買股票。呢個無辦法，前晚彈得咁大力，睇圖都難跌。不過都仲係嗰句，灰燈著左之後，其實個價無乜點變，55xx著灰燈，尋日都係55xx。如果減息之前已經破頂，睇黎下星期真減反而就跌返，sell the fact。
當然，升都唔係完全無道理，尋晚啲數據整體都利好。先係歐央行減息0.25%，咁美國減息都唔會顯得息差差太遠，到時美元稍為唔使跌太多。之前講過，美元跌會令海外投資者想割禾青，跌無咁多咪割少啲。跟住新申領失業救濟金稍為升左啲，前值22.8萬，最新23萬，支持減息決定。美國PPI報1.7%又係跌過預期1.8%，都低過前值2.1%，又係支持減息。最後講多個當然，當然，個市話要升，有時就乜都係原因，所以有時要捉住啲微妙嘅變化，累積去睇，例如之前同大家講嗰啲家庭資產配置比例、信用卡90日拖數比率etc。所以我依家覺得要預黎緊有危險，但要睇圖表確認，唔好諗住即刻奶野。
再講港股，cap圖時個市頂住17472，跟住好快個高位都破左；但到篇文出街時又低過17472。總之17472係另一關口，又係睇有無3日，有就萬八。再睇埋下圖，期指就睇佢企唔企17450樓上，呢個位係高位開始畫嘅VWAP位置，守到有望向上。目前就期指同現貨都喺呢啲關鍵位，怕嘅可以食糊。
指數就咁，反而可能個股值得玩多啲，例如油價好似穩定返，油股應該未咁快完。仲有國際金價因為減息預期而升，咁金礦股都應該仲有幾日玩，直到真係減息。而內房你掂唔掂？存量房貸傳減息喎，但又係彭博傳，呢排有啲驚彭博，之前先假傳NVDA收傳票。股票買唔晒嘅，內房就算啦。
Hengor's BLOG 