先update Risk on/off，又變返正數，但係幅度唔大，換句話講以風險胃納去睇，個市其實唔算有大方向。望返上面個圖，其實都吻合呢個講法，雖然尋晚美股大V反彈，好有氣勢，但實際上轉灰燈係5616.85，尋日就5554.14，差別其實唔大。
細睇返入去，尋日出左CPI，大致上符合預期，係核心通脹3.2%似乎無再跌，因為住屋成本高企。但呢粒數相信對尋日應該影響唔算大，目前大家最關心都係就業數據、衰退呢啲野，只要通脹唔太離譜，大家都由得佢先。而呢粒數基本上更加確立左下星期聯儲局只減0.25%而非0.5%，跟住落黎大家都係繼續睇呢個係衰退性減息定係預防性減息，性質唔同結果唔同，減得黎衰退後市會跌，反之會升。
咁點解早段連同開市前期貨都跌呢？我諗同yen 升有啲關係，尋日yen 升穿左8月5號黑色星期一個高位；不過今日返返去142.6，暫時安全。另外，我認為同總統大選好有關係。大選辯論阿侵無之前咁精靈，易俾人激嬲，又講左啲俾人恥笑嘅野——話啲非法移民食居民嘅貓狗。呢樣可能係真，但係佢拎唔到證據出黎就搞到件事係柒柒地。相反，賀錦麗俾《紙牌屋》嘅專家顧問train過，表現好左；事實上佢唔使勁好，好左就已經夠攞分，大家知道美國依家有幾偏頗家嘛啲MSM（Mainstream media）。賭賀錦麗會贏嘅資金於是多左，連Harris trade都出埋黎，啲太陽能板股票都有人炒。然之後，Taylor Swift再打左拳出黎，呢下攞命，原先阿侵嘅賭盤都仲頂得住，但係TS抱住隻貓出黎話要投賀錦麗，然後啲賭盤就偏晒去賀錦麗，阿侵再頂唔住。大家唔好睇少藝人呼籲，事實上民主黨嘅入面有好多係啲單身女人。已婚男女、單身男人，全部都係稍為傾向阿侵多啲（即係類似55:45之類嘅比例），但係單身女人就嚴重地傾斜向賀錦麗，去到68%，得不足1/3會投阿侵。而呢個群體嘅形象就係不生不育，成世同隻貓過嗰啲。結果Taylor Swift就係抱住隻貓出黎，不得不佩服啲形象公關計得幾準。由Tim Walz呢啲老白男到Taylor Swift隻貓，同埋賀錦麗嘅背稿不求出錯，好明顯見到民主黨公關係贏幾十萬倍左右。
講左好多政治操作，而關事嘅係：賀錦麗嘅企業稅將會由21%->28%，對比阿侵提議嘅15%，你話啲企業將來盈利能力會點？所以明白點解賀錦麗佔上風點解美股會跌啦。
然後大家應該都知皮褸黃嘅演講暴力救市。先係話Blackwell大把人要，然後人地話AI貴，佢就話AI可以大幅提高生產力。其他人都係咁講，但佢講有說服力啲，同埋好友都要搵理由去買，所以大大力升！以最上幅圖去睇個風險胃納，其實就正路，總之個市未係一條線直上直落嗰隻。
至於港股呢？外圍咁澎湃，跌轉升，加上尋日我都話，近日跌得多，RSI偏低，小心彈下；結果目前就係彈緊，所以叫左大家不要追淡住，等返個市上17250。執筆嗰陣就係17250附近，但個市好似有啲氣勢，做唔做淡就自己計數決唔決定賭。
Btw講起外圍，想講多句。以前美國經濟同中港緊密，所以外圍升就當然帶動到中港股市。你個客富貴，佢多啲錢買你野，咁梗係好。但依家生意關係無咁緊密，所謂跟外圍升就得返心理作用，咁會有幾好呢？
Hengor's BLOG 