腰即是YIELD
今日港股無市，講啲宏觀啲嘅野。
Highlight左我覺得尋晚比較重要嘅數據。上圖個非農係ADP（Automatic Data Processing），人稱小非農。要留意小非農個採樣方式同大非農唔同，所以小非農衰又唔代表大非農今晚都一定衰嘅。但係依家啲經濟數據明顯係一種MIXED嘅感覺，非農新增職位開始縮，但係新申領失業救濟金人數又無乜增加，持續申領嘅人數亦唔見增加。再睇埋Highlight左嘅非製造業PMI，條數亦都唔錯；順帶一提，唔需要太擔心美國製造業PMI唔多好呢件事，始終依家美國製造業只係佔10%多啲（雖然每屆總統大選呢班製造業工人都好決定性）。亦即係話單睇就業市場，啲數據係有好有壞咁。如果話呢個代表勞動市場剛剛見頂，開始轉差，未去到勁差，成件事都好解得通。上圖19:30嗰行都見到「挑戰者」炒人數據比前值高左近2倍，一路亦都有裁員新聞，就算未話衰退，都肯定唔係一個擴張周期。今晚非農如果好嘅話，都係拖慢發作時間，唔好嘅話——都可以係拖慢發作時間！讀落好廢話，但真心，非農唔好，可以係預大幅減息，9月減夠半厘。
當然，剛剛嘅野廢唔廢就睇個人修行喇，我想講嘅係衰退機會頗高，年尾至出年可能要散，但短期走勢就係大戶庄家籌碼決定嘅結果。非農唔好咪即刻炒大減息囉，但之後呢？結合我之前講嘅野，減息令美元轉弱，海外投資者就要蝕匯水；除非股市表現保持強勁，可以彌補匯水損失，否則我點解唔平倉？唔平晒都平咁啲囉。咁如果要股市保持強勁，即係啲企業繼續搵更多嘅錢；但問題依家開始炒人，即係無繼續擴張去搵錢？除非你話AI、ROBOTICS嘅發展已經令啲企業可以依賴多啲機械，否則炒人呢件事至起碼係停滯嘅意思。當然，如果重新有擴張嘅趨勢，所有野就可以再睇高一線。咁呢樣野我相信同新總統嘅稅務政策都有關係，特朗普就話企業稅減到15%，賀錦麗就話由現時21%加到28%，你話邊個對股價好啲？仲未計資本增值稅、未實現增值稅嗰啲。
最後再貼埋美債十年腰同美債兩年腰嘅相差，剛剛由倒掛係咁易上一上正數，然後又負返少少。留意9月係咪企穩正數，係嘅話，又增加一個相當可靠嘅衰退兆頭。
Hengor's BLOG 