貼左港股先。恒指現貨開市17474.74，係咁易高過17472，非常接近。係咪呢，計出黎嘅位成日反覆接近嘅；不過今次唔係做支持阻力，無乜意思，純粹拎黎講下咁解。
再睇返恒指，明顯地守唔到跌落黎條VWAP，似乎又双叒叕玩完。而最重要係，今轉升上18000左右就停步，而18000就係5月20號高位跌落黎嘅跌勢之中最大嘅成交價位，即係所謂Point of control。我地睇返今年高位19706，就係2023跌勢嘅最大成交價位。大家可以睇到，呢啲大成交位可以頂得好死，係好重要嘅支持或者阻力。用呢個角度去睇，8月5至8月30嘅升勢，期指大成交價位大約係17120，計返高低水，現貨大約17165左右。睇下未來幾日到唔到，到就穿埋今年中位17250了。
當然，港股最叻係跟跌唔跟升，佢自己應該無乜跌嘅故事（本身亦無升嘅故事），但外圍咁隊，港股都會跟嘅。跟跌嘅元凶相信就係美股呢邊，一方面個ISM製造業PMI又双叒叕跌過50，投資者又双叒叕擔心經濟衰退。我擔心呢樣都好一陣子，有睇開都見我講話8月頭非農個擔心就早得滯，但應該有，總會有，結果依家又拎PMI黎做文章。ANYWAY，大家見上個星期PCE已無人理，明顯大家轉向睇衰退呢個因素，所以星期五非農好重要。重要啲咩呢？本身升得太勁嘅應該都未必有得再升住，但係唔衰退至少有得輪動，炒下傳統野。
除左PMI，最重要梗係NVIDIA俾美國司法部搞佢反壟斷啦。我諗呢壇野都拖一排，未必係太好BUY the dip嘅機會，因為本身都增長得無以前咁恐怖，依家又有司法風險；加埋黎緊減息，海外投資者都可能會諗匯水會蝕，如果無一個強勁升幅，倒不如食糊？同埋賀錦麗如果當選，就算個稅改無依家個版本咁恐怖，係一個弱化版本，但都會嚴重影響利潤，咁就越近選舉越可能要縮縮。
anyway，一陣同DAVID策略王傾下。
Hengor's BLOG 