大市短評20240902
上個post有人問，減息乜唔係利好多啲科技股咩，點解會升返道指呢？作為資本開支重嘅行業，減息理論上的確利好科技股，但我地可以睇睇下圖先。
個市場開始升金融、工業、原材料、公用事業同康健護理，所以道指做得比納指好。而留意返，科技股係牛市中間升，依家開始升啲科技股後面嘅野(當然，之前都KEEP住有升嘅，依家澎湃啲咁解），代表乜？呢個輪動可能代表差不多玩完囉。但要記得，美股嘅牛都幾長下，唔係話佢即刻散，你諗下科技股叫做喺中間，但係中左好耐。
至於點解會咁？雖然話以往嘅情況唔可以話100%會出現返，但我有少少傾向今次減息係會跌。之前都提到，經濟無衰退而減息，個市會升；經濟衰退而減，個市會跌。之前我都講過好多經濟隱憂出黎，就算最終無咁嚴重，都可能引發調整，只係經濟衰退嚴重就跌多，唔嚴重就跌少，但都有機會跌。大家諗下呢幾年美股嘅升勢係由全世界資金推動，唔單係美國自己，因為最主要大家要炒AI都要去美國，唔通買港股咩？有邊隻AI？通義千問定文心一言？所以美元指數、美息、美股都一齊升。咁好嘞，NVDA話你知佢會繼續增長，但開始增長得無你諗嘅咁勁喇；然後聯儲局肯定會減息，美元會稍為轉弱。咁對美國以外嘅投資者黎講，揸美股嘅回報可能會低左，然後美元回落連匯水都蝕埋。咁樣埋單計數，係咪應該升埋啲牛尾會升嘅野呢？
除此之外，仲有賀錦麗嘅稅改呢？計劃將資本增值稅加到44.6%，未沽出資產嘅未實現利潤都話要徵25%（徵Net worth 1億鎂嘅人啫，除非你係，咁記得畀啲生意細佬❤️）。當然未必過到，但係市場唔中意風險的。
ANYWAY，頭先講嘅比較未發生得晒，可以參考嘅係留意啲科技股後面嘅野，好似之前講嘅ROST、COST咁。另外UPDATE返，RISK ON/OFF指標仲係灰色，未轉紅，但已經輕微變負。佢未變紅都唔理佢住，感覺上SPX應該可以破頂，而唔講感覺嘅期權都好多人押注會繼續升。RISK ON/OFF會繼續UPDATE大家，佢轉紅先驚啦。
港股就係威係勢，又隊返落落VWAP樓下。維持原判，佢企穩VWAP樓上3日先算，唔想再俾佢呃。港股真係假得可以。
Hengor's BLOG 