先貼港股。紫色係今年高位拉落黎嘅VWAP，如果相信有庄家，而庄家之前係沽貨隊落黎嘅，咁似乎港股好有機會係消化左之前啲淡倉。即係咁講，如果你係庄家，你想做低個市，會唔會想有人沽得貴過你？應該唔會想，因為咁樣意味住會有啲散戶意志唔堅定，未沽到目標就平倉買入，搞到有上升壓力，咁就更難跌到目標再掃貨。所以最好唔好啦，庄家唔想你沽得高過佢，唔想你買得低過佢就係咁解。
但就算你唔信有庄家，個市寬的確改善不少。你睇啲權重股，雖然未返到上今年高位，但有唔少都升到接近高位。再加上就算你當VWAP係一條普通平均線去睇，恒指都係暫時第一次升穿完再穿上去。睇返上面幅圖，前面都試過升穿條線，但係一升穿就有沽壓打個市返轉頭；今次本身都有，但又好快上得返。走勢上係幾唔錯，不過前面沽落黎嘅時候，期貨喺18000有大成交，所以個市連續兩日咁澎湃，9月初返黎可能又變返磨，消化下先。而講到啲個股，最近啲業績都頗唔錯，好似話俾人聽，大陸個經濟無想像中咁唔掂咁；而統計局出嘅數據都係話有好轉嘅。當然，大家可以話佢做數，但係做到連公司都真係有錢賺又似乎難啲，只可以話有時現實同大家感覺可能有啲差異。至起碼就係，就算話差，有幾差？差到盡頭未？所有野都有個價，啲野有改善，點都彈一彈，但上限去唔去到歷史高位就另計咁解。
美股呢邊都係要update返下嘅，Risk on/off條數越黎越弱，不過仲係力保住個正數，風險胃納未算太差。所以睇埋三大指數都見到呢樣野，道指繼續剷上去，納指標普就無力，主要俾NVDA拖低。亦即係整體唔算太差，有資金輪動。亦都有可能大家見臨近8月尾，小心為上，因為傳統9月都唔得。所以有人問返尋日個post，NVDA咩位入返，我覺得有喺手唔使太理佢，無喺手嘅，下一個支持可能係105-106。總之唔急。
Hengor's BLOG 