即係咁講，大家瘋狂去畀期望，係間公司問題定係投資者問題呢？答案係：呢個唔係一個重要問題！
影響到全球股市嘅NVIDIA出左業績，其實都係好過預期，第三季收入300億鎂，預期係288.6億鎂唧，每股盈利0.68鎂>預期0.64鎂，數據中心收入263億都好過預期。咁盤後交易佢跌乜？個講法就係公司預期第三季度收入唔夠勁，預收入325億鎂，但其實呢個數字都係多過平均預期嘅319億。即係咁，你高過平均預期都唔得，要高過最高預期嘅預期，或者至少等於最高預期，股價唔會跌。呢下就係我話資優生嘅問題，次次考試默書都90分，你預下次拎95分啦，人地就話點解唔係拎100分？
不過呢個就係解釋依家嘅跌啦，長期黎講都仲係一個好投資黎。主要佢技術係護城河黎，有CUDA、NVLink。而AI嘅軍備競賽亦都仲未玩完，個市場仲係好需要佢。AI作為第四次工業革命，仲未去到廣泛普及應用，時間仲有幾耐呢？第一次工業革命係蒸汽機帶黎，要62年先真正有用，第二次係電力，要30年，第三次係互聯網，加速到15年。按照呢個速度，每次都減半，AI最遲7年左右就發揮佢真正功能。到時候結合埋區塊鏈、元宇宙、ROBOTICS嗰啲，基本上人類文明就係去到電力換算力嘅時代，亦即係喺現實世界開辟多個虛擬世界出黎。呢樣野如無意外就2030出現，咁即係去到2030年前，Big tech GIANTs都仲要軍備競賽。
所以又咁講，之後依然大把世界，NVDA本身都係整體向上，之後有咩問題都應該唔係佢自身問題，可能係啲流動性危機。但變相即係每次危機佢都有買入機會，有護城河嘛。咁計嘅話，今次份財報好過預期，而唔係超級好過預期，可能係好事黎。食正埋佢老友SMCI疑似假數風波，半導體隊一隊落黎，然後N記下次又好過預期，咪又係有得上返去。簡言之，今次嘅財報唔似係個轉折點，但時機上配合埋佢老友啲風波同埋9月傳統嘅弱勢，可以等佢跌個好位出黎。股票就係講個等字。
UPDATE返，LQD/GOVT個數都跌左兩日，就快變負數。投資黎講就未必太擔心，但短炒就可以參考呢個，唔維持正數就小心啲。
恒指方面，期指升穿左阻力VWAP一日又縮返。之前其實都試過，所以我之前點解話要佢企穩3日先信佢真係牛返就係咁，佢唔係未試過扮企然後縮，7月12號嗰棍係威係勢都試過。暫時唔好太進取，加埋美股傳統9月都麻麻地，港股都好叻跟跌唔跟升，咁要睇穩啲。真係企穩到VWAP，上面應該大把世界，唔擔心。又或者至少等個市寬進一步改善先。
BTW前日提過美團，就話成本無問題嘅就應該無問題。依家睇佢業績超預期，加埋佢搵到套模式控制到成本，咁如果大家相信中國經濟持續改善嘅，咁3690應該幾好。依家咁嘅經濟佢都搵到product賺多過大家想像，咁之後經濟改善呢？
當然，即係話個總體經濟係重點，相當影響佢盈利能力；至於呢點我唔多講了。
Hengor's BLOG 