大市短評20240828
今日短評應該更短，因為個市場都等緊大事件。
大家見到都幾明顯，標普仲係價升量跌嘅款，所以點解短評更短，投資者同投機者都未係太大信心行動。而呢個當然就係因為Nvidia今晚出業績啦。睇期權市場嘅預測，Nvidia出業績可以令股價有正負10%波動，所以個市稍靜都好正常。畢竟分析師已經對Nvidia業績有好大期望，每股盈利又估佢double以上，上次0.25美元，於是估今次開0.59美元。資優生就係咁，大家期望好大，但係期望一做唔到就可能有大波動。拿唔係叫大家沽，佢做到預期都可以引發大家讚嘆，然後FOMO，fear of missing out，一驚錯過就搶，所以期權市場先估佢可以正負10%。喺咁嘅情況底下NVDA出業績呢件事輕鬆變得大波動過Jackson Hole鮑威爾講話。
然後講一句技術型態，LQD/GOVT嘅變化繼續稍為轉弱，令Risk on/off指標都稍為轉弱，不過未轉紅燈。呢個情況都正常，始終個個都睇住NVDA做人，炒都唔爭在嗰一日半日，不如稍稍避下險。
至於港股，目前走勢幾好，呢幾日同大家講嘅高位紫色VWAP大約喺178水平（唔記得係邊條嘅，可以睇睇尋日篇blogpost），尋日亦都升穿埋。而暫時今朝低位都踩住呢個位。可以留意住，如果3日都唔跌返穿呢個位，應該後市都唔錯嘅。另外，上面貼左幅圖，係我用Tradingview嘅pinescript寫嘅市寬。大家見到8月13號個市寬升返穿移動平均線，目前都超過左50，即係話啲權重股都開始升得越黎越好。有可能配合埋美股，升到9月中減息之前。之後係點就唔知，都可以繼續升嘅。
油價似乎都係俾下降軌壓住，中東嗰邊好似都配合左咁。上面77.8下面72，睇下之後爆邊邊。
Update下。港股真係好癲，出完文之後跌到好似前日派左貨咁，癲lol
Hengor's BLOG 