大市短評20240827
首先要update一個變化先，就係risk on/off指標變左灰色。仍然係正數，唔太擔心住嘅，只係尋日公司債債價跌得稍為快過國債債價，即係稍為有返多少避險意識。除非持續轉弱，否則未可以睇得太淡，只係見到灰色就值得留意一下。
呢種避險意識估計係同NVDA業績有關。過左Jackson Hole之後，大家最著緊嘅就係龍頭大佬業績。尋日做信報時有講，呢隻野比較麻煩，因為太叻仔。賭佢唔得又唔敢，AI照計仲有5-6年先真正發揮功效，所以呢段時間都仲係要發展，咁Nvidia啲野就一路要買，甚至軍備競賽咁搶。但每次佢都做得太勁，變左個期望扯到好高，亦都可能係一早已price in，業績公布如果好靚，但唔夠預期咁靚，都可能會回。拿，就唔係話真係會回。於是事前可能有投資者已經買定put黎對沖，買到貴晒就轉買指數put，都仲係未買put嗰啲點算？焗住賣咁啲正股，呢下回落亦都可能就係咁。所以我頭先講嘅唔係話佢真係要跌，係講投資者嘅做法；咁跌左落黎，係咪要賭佢業績就自己決定了*。
講到業績，NVDA係星期三，仲有咩係星期三？就係美團嘞。美團都似乎好似上面個概念咁，縮返啲落黎。而且大家見到拼多多玩業績玩到咁，搞埋阿里巴巴同京東呢啲，美團呢啲就快出業績嘅都驚一驚。當然，大家見到衰野係會驚啲，好野就見唔到，即係9961做得好大家係唔會諗，3690會唔會都有咁好？大家都係比較避險嘅。我諗美團最主要要睇佢成本控制得好唔好，成本做得好就應該前途會好啲嘅理論上，因為中國7月零售銷售係改善左家嘛。如果你唔信中國數據就無計啦，信嘅話係應該會慢慢改善到個經濟嘅，至少係好過依家。同理，阿里巴巴呢啲都可能係跌突左。不過呢啲野都好講個人喜好，唔一定要買港股嘅。
條高位拉落黎嘅VWAP暫時頂住左178呢個水平。睇下今日下晝以至未來幾日企唔企得穩，最好企3日。
最後講少少中東。真係講好少。紐約期油大約77.8有阻力，距離依家爭幾毫。睇下黎巴嫩同以色列嗰邊會唔會有默契，油價上多幾毫就收手。
*理論上，過去表現就賭NVDA業績嘅勝率幾高嘅
Hengor's BLOG 