大市短評20240826
上星期最觸目嘅相信一定係聯儲局主席鮑威爾全面轉鴿啦，唔同你講循序漸進喇，講明要減息嘞。短期黎講，減息對資產價格係好事，問題係減息決定嘅背後依據唧。依家好明顯聯儲局唔係最主要睇通脹，而係轉去睇勞動市場。配合埋美國勞工部大幅下修非農職位呢樣野去睇，聯儲局係咪睇到啲我地睇唔到嘅野呢？
聯儲局做嘅野講嘅野好似摑LARRY SUMMERS*一巴咁，LARRY SUMMERS話要衰退、失業率要升到6%先壓抑到通脹；聯儲局依家就話唔使喎，無衰退我地都壓到通脹，幾叻。但係大家望下個市，接近歷史高位，無記錯股市接近高位都減息係史上首次。個市咁暢旺，無錢嘅直頭可以問股市攞啲黎使下，呢個情況底下，就算壓到通脹，真係有需要減息？一減，唔怕個市更加過熱，財富效應令大家使多左錢，又谷起通脹？所以我覺得鮑威爾心底嗰句係覺得依家個經濟有浸虛火喺度，隨時爆，所以先要減定先。非農又下修，信用卡又拖數，破產保護申請又急升，呢啲因素似乎重要性超過左通脹。
不過又咁講，唔係叫大家沽，千祈唔好太早睇淡美股，大家有睇過《沽注一擲》（The big short)架可？啲人開始走數，個市都可以拖足成年先跌，太早行動真係夾爆你。我地只需要提高警覺，知道音樂椅遊戲就完，隨時停音樂。但係話大手沽就真係唔好，好似上圖，risk on/off指標仲係綠燈，風險胃納仍然好好。反而依家可以考慮啲經濟好又好，經濟差都好嘅公司，例如ROST、COST呢啲，ROST Ross stores就平價百貨，COST Costco就平價超市，唔爭在睇埋WMT WALMART。睇啲技術指標去入場。
港股都講少少。淡又唔係好淡，都係嗰句，前面166企到就唔太淡。但係上圖見到嘅紫色線係今年高位開始拉嘅VWAP，似乎壓住178水平。與此同時，178係先前比較大成交嘅價位，即係多蟹貨。加埋樓下都幾多牛證，171到173幾咁澎湃。
*LARRY SUMMERS係美國前財政部長、前哈佛校長，好犀利嘅經濟學家
Hengor's BLOG 