大市短評20240820
大家見到個叫做Risk On/off 嘅指標就係LQD/GOVT計出黎嘅指標，明顯見到依然相當犀利。除左保持綠燈，大家都見到佢嘅長度比前面造出歷史高位嗰陣更加長更加高。實際上尋日距離歷史高位都只係爭1%左右。所以係咪呢，月頭日元拆倉，所以野碌晒落黎，嗰陣已經話唔好睇到個美股太淡。無論你用宏觀經濟、企業盈利、技術分析，都未到美股轉淡嘅時候。
宏觀經濟黎講，之前大家講嘅失業率上升觸發薩姆規則SAHM’S RULE——號稱100%準確嘅衰退指標，其實係有漏洞嘅。一個就係之前講過嘅天氣問題，早排美國颶風來襲，新增職位少左都好正常，失業率上升都正常，單憑一次被天氣影響嘅數據就斷定已經開始衰退就太早，我地需要更多數據。
第二個漏洞就係個指標可能有over-optimization問題。咩係over-optimization呢？個AI即刻HIGHLIGHT左，話呢隻字太複雜，要解釋一下。如果你有試過設計程式交易，就會發現好易造到一個會「賺錢」嘅策略，但係一實際執行就輸到飛起。咁係因為你用歷史數據去設計交易系統，然後再試出一個最好嘅決定因素，例如試過無數次之後，你發現14日RSI比8日RSI好，然後就用14日黎設計策略嘞。咁樣你梗係會贏錢啦，呢個數字適合過往發生過嘅交易丫嘛。但係將來嘅交易呢？呢個就係老掉牙嘅講法，過去表現唔代表將來表現。薩姆規則都有呢個問題，佢係2019年發明出黎，原作者經濟學家CLAUDIA SAHM都係試啲規則出黎，如果唔係，佢點知要用3個月平均失業率？點解唔用半年平均值？又點解係比較過去12個月最低失業率？點解唔比較2年？點解唔係其他長度？總之就係試過不同組合，呢個最好用，解釋到過去100%嘅衰退——即係1950年以來嘅11次。講真，中左11次，今次第12次就算唔中，都依然係好準確嘅指標，但係你用黎做交易根據嘅話，無揸都算，如果係用黎沽，咁就夾到飛天。
由於今日係短評，企業盈利同技術分析呢兩個因素就唔繼續解釋喇，太長了。反正大家望住我post畀大家嘅指標都見到個市無咁壞。
呢幅圖做埋LQD/GOVT指標同VIX嘅比較。睇落似做得過，值得做backtest。
至於港股都講兩句，淨係恒指唔講個股，費事太長。上圖框住3日就係7月22，23，24號嘅派貨組合。呢三日收市平均價係17472，目前已經升穿。但係呢三日高位分別係17693，17707，17516，而尋日高位就17685，即依然俾呢幾日派貨組合頂住，所以都話好多大佬要打。加上8日RSI都上到近70，以恒指嘅體質的確係容易頂一頂。但又係嗰句，未必太差住，都要繼續觀望下，畢竟外圍又未轉差，加上恒指熊開始多，當然牛都唔算少。加埋就即係上上落落，係無美股咁好景架喇。
Hengor's BLOG 