大市短評20240819
畫面相當核突，但唔緊要嘅，有導讀就得嘞。上面咁混亂黎講，我睇未來比較重要嘅係紫色條VWAP，位置大約17850。呢條VWAP係乜？就係全年高位開始計嘅VWAP，如果相信有庄家，即係庄家累計出嘅淡倉嘅均價（經成交量調整）。升唔穿，即係啲淡倉可能未出晒，佢唔想你高過佢嘅價沽；升得穿就可能清左淡倉。如果唔信有庄家就當呢啲唱歌啦，當係一般平均線睇囉，都有啲參考。
上星期五我就提到7月22，23，24三日派貨平均價係17472，然後上星期五高位就見17473.89，然後收返去17430.17。我又諗起5月29號，當日我講18476係重要價位，有睇過直播同我FB post應該記得我講過；然後當日低位跌穿過18476，跟住就收18477，好似扮守咁。點解會諗起呢日呢？通常呢啲扮守或者扮升唔穿，跟住就穿，庄家係喜歡同大家玩遊戲，所以5月29號扮守得住18476，然後就失到今日；8月16號扮升唔穿17472，跟住夜期就夾，到今日都繼續有。
但係大家必須小心，就好似上次我話，打完17250呢個大佬之後，又有17472呢個大佬，大佬不斷。點解？因為港股4月到5月嗰期係威係勢咁升，之後不斷縮，又係積左唔少派貨位，基本上每二百點就一個大佬。去到最後尾，要真係可以破返今年高位，可能要企返18476。所以就算食住外圍風險胃納好轉而炒港股都好，都係摸住摸住去，同埋細注為妙。要容易嘅都係去返美股。
係咪？美股有個比較可靠嘅風險胃納指標，LQD/GOVT指標都仲係綠色。唔可以話佢一定贏，但機會率唔低。btw上圖轉左一啲parameter，因為我個frd話backtest出黎效果比較好。我就比較懶，未親自backtest過，佢咁講我咁聽，於是轉左。如果你地拼埋幾日嘅圖會發現有出入，上圖比之前嘅遲兩日左右。
上個星期嘅經濟數據留返上星期，唔再講；今個星期大家期待下Jackson hole，睇下點樣影響風險胃納。
Hengor's BLOG 