我覺得呢幅圖同我尋日講嘅野有嘅相通之處。我尋日提到一個假說，就係左翼覺醒文化運動*目的係削弱家族紐帶同教會力量，從而令政府相對更強大。
我地依家望返幅圖，幅圖講嘅係25-29歲嘅成年人，有幾大比例係同父母一齊住。平均值下面嗰啲國家比較有錢啲，同時亦都woke啲。
古代人喺社會嘅主要依賴係宗族、宗教、封建領主（唔講自己啦，自己有力量就唔使依賴人啦；咁但即係自己就係騎士或以上lol，反而係其他人依賴自己）。
現代人就用國家取代左領主，即係宗族、宗教、政府，當然仲有工會，古代就即係行會（行業個行，唔係行政會個行，讀音唔同）。呢度淨係講最主要嗰幾種依賴，慈善團體或者工會嗰啲唔計。
至於係啲乜野依賴呢？主要係人身安全同糧食呢類。喺出現社會之前，呼呼嘿嘿嘅時代，在森林和原野是多麼的唔逍遙，好多猛獸，所以原始人唯有合作，形成社會（最早嘅社會，其實都係呼呼嘿嘿緊）。到後來有農耕技術，有無形之手去分工合作，有人負責生產，有人負責保護生產，有人負責同神明溝通、指導生產。喺呢種情況之下，好多人都係唔具備保護自己嘅能力，唯有依賴政府或者軍隊帶黎秩序；水災旱災亦都要依賴政府賑濟糧食。現代社會差唔多，諗下古巴導彈危機嘅時候，平民唔依賴甘乃迪總統，唔通自己抵檔蘇聯嘅核彈呀？
上圖平均值下面嗰啲一般社會福利比較好，比較大政府，甚至比較woke，家族紐帶就比較弱（無乜裙腳仔囉），教會力量亦都衰弱緊。於是似乎對政府嘅依賴都比較強，推廣左翼思想嘅學者都係依附喺公帑資助嘅大學，同古時候依賴政府賑濟差不多。
至於上圖平均值以上嘅國家窮啲，亦無咁woke；窮就唔好靠政府喇，所以就對家庭依賴較強，比較黐家，又或者比較虔誠，拜得神多自有神父庇佑。
咁樣推論落去，某程度上，點解呢個世界會有右翼抬頭，相信係因為某啲人係窮左，國家亦都窮左。窮就唔好旨意政府，宗族同宗教力量就會相對轉強（相對嘅意思就係政府相對弱左，因為太多秩序消費者，或曰政府依賴者）。
上面你見意大利喺平均值以上，所以就選左Meloni呢個保守派。而最近西班牙都好似出現左反＿＿＿嘅示威，示威者話：SPain is christian and we don’t want _____ and _______。（自己估啲橫線係乜，我唔想冒犯宗教，亦都唔係呢篇隨筆嘅目的，我只係陳述）呢樣野亦反映西班牙有班人係反對緊左翼主張，而且係搬埋宗教出黎。
好喇，講返轉頭，講上面嘅野為乜呢？大家應該記得上星期我寫《鬥爭的起點》，講到當全球化開始逆轉嘅時候，世界可能經濟會全面變窮，然後就引述亞里士多德嘅講法「貧窮是犯罪和革命之母」。如果上面嘅推斷同我尋日講嘅野係正確嘅，覺醒運動係同擴大政府權力有關，咁連埋《鬥爭的起點》去睇，就可以預期右轉嘅反抗會由上圖平均值以上嘅國家開始先。唔怪得法國上次選舉無大家想像中咁右。
利申：禾唔是讀社會學的，只係我對wokeism 嘅一啲睇法，今次亦都講得相當中立，淨係講個現象同埋implications，無批評。
*Quote自維基百科：覺醒文化（英語：woke[a]）是自2010年代以來美國人對有色人種、同性戀社群和女性身份認同政治的左翼政治運動的稱呼[1]。覺醒文化最初針對的是種族歧視和偏見，不久又拓展至社會不平等、性別和性取向等方面。
Hengor's BLOG 