大市短評20240816
上面幅圖睇到啦，LQD/GOVT指標雖然唔係話喺升市嘅起點就轉綠，但都係早過好多經濟數據轉綠。就算你唔信有大戶、庄家或者威科夫所講嘅CM，都應該相信係有大錢收風比我地早，或者有財力請一班人去收集數據做分析。我地無呢啲能力收集數據做分析，只需要跟下佢地就得。大家見到上圖，轉紅係7月19號(收市價5504.99)，雖然唔係頂位，但係轉紅之後跌跌跌；到8月9號轉綠(收市價5344.15)，雖然唔係低位，但係轉綠之後升升升，尋晚就收5543.21。
咁當然，慎防有人唔知出左咩數據，都要講兩講（雖然我相信大家都有睇新聞）。今個星期連續出左PPI，CPI，同零售銷售，前兩者就指向通脹降溫，後者就話無衰退。成件事相當美好，又可以減息，又唔怕衰退。一百個人可以有一百個睇法，你可以覺得係咪太樂觀，而我都仲係擔心信用卡條數嘅問題。不過我唔會用我嘅擔心去做落決定嘅根據，都係睇返市場點樣解讀會比較好。股市喺短線始終係鬥傻嘅遊戲，佢自己有想行嘅道路。長線先返返去啲基本面，睇返個盈利能力。
返返黎港股市場都有咁嘅事。睇下騰訊，業績唔錯，但係個市要佢跌就係要跌，而事後就總有解釋。所以有時係咁，分析都要做，但做完都睇下其他人點解讀，然後隨波逐流。只係最後先會反映返真實情況。既然講返港股，都講兩句恒指。全年中間位17250叫升穿左，不過下一個大佬就係17472，呢個係7月22,23,24號嘅平均價黎，而呢三日係派貨嘅。即係咁講，如果前面派貨嘅價係呢個，咁企得返穩就可能意味住已經喺低位食左淡倉。所以企到17472 再算。
今日出得比較遲，今朝傾得比較多電話，有啲忙，唔巧意思！
Hengor's BLOG 