今日隨筆想講兩樣野。
1.
今日收到一位讀者課金請我飲咖啡，真係非常感謝！值得寫篇隨筆記錄呢件事。
其實我本人都唔係啲好有信心嘅人，唔知道自己嘅文章值唔值錢或者值幾多錢，所以大家見我係買個domain整網站，而唔係開個收費嘅PATREON。但係我又相信文字有價，我寫一百幾廿篇，可能點都有啲係hit到你掛，或者貼LQD/GOVT指標可以幫到你賺錢嘅，咁都希望可以請我飲下咖啡或者資助我domain嘅開支lol。
今次因為一篇文章而收到課金，最主要真係增加左信心，如果唔係都幾懷疑點解要寫。希望我以後都會繼續寫到啲大家覺得值錢嘅文章，然後大家可以幫下我。
幫我嘅方法有好多，例如：
- 課金，呢個最直接，買domain租server都要成本，如果回到本就非常感謝！
- CLS，留言、點讚、分享，寫得唔好就話啫，如果覺得好嘅，希望可以CLS，幫下個觸及率
- 介紹下要移民嘅朋友黎做移民前理財，或者介紹下保險生意（一般保險或者長期保險），甚至係介紹一啲走資嘅生意；呢個blog都會寫呢類文章，早排先寫左PPLI呢種高端產品
- 如果你有朋友或者親戚需要呢種大額資產管理、EAM嘅生意，大家甚至可以合作下添，歡迎PM
anyway，再一次感謝呢位讀者，對我嘅信心真係好重要，感激感激！
2. 承接返今日鬆一鬆講多巴胺。講明先，我唔係讀相關學科嘅，我又唔想做資料搜集，畢竟呢篇係隨筆，想分享一啲我嘅睇法咁解，所以大家都隨意睇睇啦。
話說今日講多巴胺嘅時候，無為提到另一樣野叫安多酚（又叫內啡肽、腦內啡）。就我所知，呢兩種荷爾蒙都會令人「快樂」；另外仲有催產素同血清素，都係啲會令人幸福嘅荷爾蒙（又叫激素）。順帶一提，唔知大家有無聽過，抑鬱嘅話，醫生會開啲血清素畀病人。
呢幾種令人開心嘅荷爾蒙入面，多巴胺比較難搞，因為會容易成癮，亦都係我地今日直播講嘅問題。佢係一種好易得到嘅獎勵，好似睇短片咁，都可以持續釋放多巴胺，令人持續開心；所以我今日先話，叫睇tiktok大嘅一代人睇3個鐘電影，佢好難坐定定，但係叫佢坐定定睇短片，佢可以連續睇到3個鐘。聽落好似好好丫，咁易滿足，直頭知足常樂啦。問題黎喇，人對於多巴胺嘅追求係會不斷提高水平的。
呢個係咩意思？舉個例，你DAY1只係需要50個單位嘅多巴胺就滿足嘞。既然咁易得到開心，咁你會唔會想再開心多啲？人之常情啦，再繼續攞多50個單位，咁又好可開心多次喎。咁然之後，你嘅大腦就會稍為無咁敏感，DAY2就覺得50個單位唔夠，開始要100。咁但係求開心係天性，於是你又繼續做啲開心野，令大腦分泌多啲多巴胺，直到100個單位；然後你又諗，不如再黎多100丫！就係咁，你嘅大腦又再習慣左，又無咁敏感，跟住DAY3需要200，然後300，400，500……結果你正式上左癮。毒品、性愛、短片etc，呢啲上癮都係咁黎，結果就係追求緊個永遠都去唔到嘅多巴胺水平，人生就係地獄。
另外嘅幸福荷爾蒙好唔同，基本上好難成癮。血清素係黎自安全感，催產素就黎自被愛，呢啲都唔係啲反覆刺激。而安多酚又叫腦內啡，即係大腦分泌一啲似孖啡嘅激素，所以可以想像到，都係啲鎮痛之類嘅野。咩時候同你鎮痛呢？就係長期運動，例如打成個鐘波、跑成個鐘步，咁先會釋放安多酚。即係咁，睇啲十幾秒嘅無腦短片就可以得到多巴胺，但係要跑山游水先得到安多酚，咁你話邊種容易啲上癮？
上癮係好大麻煩嘅，因為基本上就代表你對呢樣野唔敏感，要不斷追求先得，亦即係距離幸福越黎越遠。例如睇短片睇左三四粒鐘，跟住內疚，覺得自己虛耗光陰，然後內疚到瞓得唔好；第二日就無乜活力，然後唯有做一啲容易做嘅野去攞幸福感（即係做成癮行為），最後又覺得自己虛耗光陰，內疚到瞓得唔好……所以呢個問題係要解決的，而方法都唔少，運動就係其中一種——用安多酚去代替多巴胺，你多巴胺成左癮所以滿足唔到啫，但係安多酚你滿足到嘛。又或者定期令自己遠離成癮之物，例如係啲電子產品，唔好睇咁多短片，慢慢令大腦對多巴胺敏感返——你一段時間唔餵佢食多巴胺就會敏感返。
最後仲想講講冥想。冥想比較萬用，基本上係幫個腦返到原廠設定，恢復健康，所以對成癮都有一定幫助。除此之外仲可以令人集中啲、瞓得好啲，幾乎係能除百病。大家可以研究下，我最近就做緊3種冥想，一係純粹冥想，就咁坐喺度注意自己呼吸吐息，5分鐘、10分鐘其實都得，你練得耐可以冥想得耐啲；二係一邊冥想一邊聽啲正面句子，呢啲大家可以youtube或者SPOTIFY嗰啲搵下，據講可以清洗你嘅潛意識，令人發達；三係HEMI-SYNC，據講係CIA委託MONROE INSTITUE開發嘅技術，呢種冥想方法會令人成仙有神通，例如係天眼通。信不信由你，或者唔使信十足，至起碼呢個技術的確幾幫到人冥想，咁樣已經好有好處了。
Hengor's BLOG 