大市短評20210815
尋日港股比較古惑。我尋日咪寫，以為佢可以企到17250，結果都係唔得。個市一路肉酸到尾，結果又企得返T-2收市價樓上，尋日嘅T-2係星期一8月12號，收市價係17111.66，尋日4點08分出正式收市價之前都低過呢粒數，要到真正收市先收喺17113.37。你話係咪古惑？照睇尋日，高位高過星期一，吸貨機會大；但係日內又隊返落17111樓下，要競價先上返去，證實俾你知係吸貨。
通常港股係古惑完之後，會繼續古惑，所以點解我之前話應該等恒指企17250或者跌穿166先郁，就係咁解。呢輪古惑可能係因為出業績，大家望下日曆*就見幾多公司排緊隊出黎。尋日最重要當然係700騰訊啦，今日佢就係有份出古惑嘅股票之一。講起騰訊業績，尋晚大家有無聽IVAN直播？無嘅下面我畀條link大家，值得學習**。IVAN講嘅野對我黎講簡直溫故知新，以前讀書要讀ACCOUNTING，但唔算太叻，聽一聽IVAN講成件事好感動。BTW，佢雖然已經講得好好，但係一條片實在未夠，如果想再學多啲，我建議大家可以買或者去圖書館睇本書，叫做《讀財報挖好股》，作者係Bittermelon，著名會計BLOGGER。呢本書真係深入淺出，睇到我覺得非常之有親切感，睇完你就明白一間公司最緊要睇乜野數字同比率，佢亦有分開幾個行業去講解，畢竟每個行業重點數字都唔同。
扯遠左，返返黎。雖然我介紹大家睇IVAN條片同介紹左本好書，價值應該大過大家繼續睇我篇文，不過循例都講多兩句。今日個市古惑在騰訊業績唔錯，但係尋晚ADR跟左外圍某啲科技股跌，結果今日騰訊都要低開，成個市又係肉酸啲。但係依家望望騰訊幅圖，又因為佢本身業績唔錯，所以陽燭上緊。呢個就係一路話，個市頂住17250唔算好，下面企到166又唔算差，結果搞到要估佢升跌都幾困難。
最後講多少少美股呢邊。暫時LQD/GOVT指標都仲係無轉紅，個解讀係仍然肯take risk。但幾大股指漲跌不一，講嘅係羅素2000尋日直頭要跌，又唔似標普或者納指咁補到8月2號個裂口。睇黎所謂嘅take risk都係take d 唔take D，唔想太落後所以要搵啲野買下，但又唔想太高風險，所以又係買返嗰7隻。
anyway，CPI溫和返好多，今晚留意下零售銷售數據，睇下會唔會嚇親人，驚佢衰退，又或者驚佢好得滯。睇黎零售銷售又唔可以跌，但係升又唔可以升得多，都幾考功夫（我意思係考製作統計數據嘅統計學家嘅功夫）。
**(1006) 【Ivan Ho 何啟聰直播】|騰訊業績即時睇，分辨業績好壞要點及策略。|Ivan Ho 何啟聰|理財|投資|金融知識|教學| – YouTube
Hengor's BLOG 