大市短評20240814
你信唔信有大戶、內幕都好，事實就係早兩日風險胃納已經轉強，我都post左LQD/GOVT指標轉綠燈畀大家。唔知大戶係咪一早知美國PPI轉弱，總之就係見到轉綠燈，願意take多啲risk*。即係咁講，就算佢地唔係一早收到風，大戶、機構投資者（Bank嗰啲)資源多，請一堆經濟學家砌model去推算經濟指標都快過我地準過我地，所以有時我地唔使操心，跟下呢啲指標，見到大錢想買野，我地又買野。
依家連美元都縮返落去。上面幅圖見到，我用製作LQD/GOVT指標嘅邏輯，製作多一個貨幣版，包含港幣、人民幣、日元同美元呢四個元素。依家似乎市況好啲，恒指都可能暫時企到17250呢個全年中間位樓上。但係唔係全面向好呢？現貨企埋17472樓上好啲。今個星期睇埋啲業績，睇下市場點樣解讀。目前黎講，啲成份股嘅走勢有啲樣衰，係9988比較好啲，所以要全面睇好都唔易，無174都唔好諗太多。
btw，順便再講多少少國際局勢。聽講伊朗又話，如果達成加沙停火，咁就可以推遲對以色列嘅報復。拿，我之前先話，伊朗見到以色列暗殺敵人咁精準，大機會唔會有大規模報復，唔會大郁；依家就放風出黎笠水。所以話呢，好多時呢啲懶係緊張嘅情況都係買入訊號，屢試不爽。伊朗想笠水，避險情緒又無咁高，美元跌，然後油價又跌，期油升唔穿下降軌，生產成本又下降，距離通脹目標又近左，聯儲局又可以快快樂樂咁減息，皆大歡喜。
嘿！尋日係咁，今日又唔知係咪，今日又有CPI，聽日又加沙停火談判，啲野日日都update緊。所以盡量跟實LQD/GOVT，睇下大錢嘅風險胃納，收風佢地一定快過我地！
*中英夾雜顯得高尚，我見啲高級華人係咁
Hengor's BLOG 