大市短評20240813
今日再貼LQD/GOVT指標。綠色係正數得黎比較幅度大，紅色就負數得黎幅度大，灰色就幅度唔夠大，正定負睇佢零以上定零以下。要點樣解讀就自己黎了。
外圍又講中東局勢緊張，所以油價升左上去。不過就咁睇圖，個走勢都尚算正常，唔知中東有新聞嘅話，都唔太覺得有咩異動，呢個就係國際級庄家嘅大能喇。用Wyckoff嗰套睇，純粹係掂到先前需求區然後升返上去，而升上去呢幾日都見到個成交唔算好大，似乎未見到一個爆升嘅強勢訊號，我建議等佢企穩80蚊再講；依家紐約期油收一收80又失返，收2日80就當佢企穩。
至於唔講油價，單係講返伊朗係咪會覆桌呢件事，我會咁睇。美國情報話今個星期伊朗會郁手，可能性應該係3個，大郁、細郁同唔郁。唔郁就唔使理佢啦，至於大郁同細郁，對股市影響應該有限。首先我覺得大郁機會唔大，大郁要資源，但觀乎佢大佬俄羅斯俾烏克蘭打到如入無人之境咁，似乎佢大佬資源都唔足，而另一個大佬似乎亦都忙緊，唔知忙啲咩，好似話最快下星期一會知。換句話講，伊朗如果自己有錢，咪自主大郁囉，啲大佬會打氣嘅。國際關係係利益計算為主，如果只係攞返個彩，向國民展示下國威，根本無需要大動干戈；最多係上次無人機同導彈攻勢嘅規模或者多少少，即係都算係細郁，咁樣已經叫做招呼左國內鷹派。畢竟以色列已經show左quali，證明你睇，佢可以喺你境內中和敵人*，新總統凳都未坐暖，應該唔想冒呢個險，而哈梅內伊張凳坐到熱，更加唔想冒呢啲險；要冒險就去冒險樂園，佢地黎香港應該免簽證。
anyway，尋日美股唔算好大波動，目前都多noise，今個禮拜又CPI又零售銷售數據。所以短線倒不如睇返LQD/GOVT指標黎判斷市場流動性如何。宏觀經濟嘅真正影響應該未到，過左選舉先
港股方面，今年高低位平均價17250，8月9號高位17252，而近日低位又似喺166水平暫時有支持。咁代表咩呢？我覺得代表好友同淡友都唔需要急，磨下先，港股好叻磨。雖然叫做升穿左一條短期下降軌，但係力度唔大。暫時今日高位又係17252。交易好多時等多過做。
*中和即係neutralise，依家啲英文就係咁良善
Hengor's BLOG 