識人好過識字，呢樣野應該大部分人都認同：識人嘅認同，識字嘅都認同；唔認同嘅可能係又唔識人又唔識字。不過呢樣野公開講，仲要係譚志源呢個地位嘅人講，仲仲要係因為請左江旻憓而講，咁就似乎唔多合適，正所謂係inconvenient truth。但又咁講，佢咁講大家又吹佢唔脹，最主要係大部分人心底裡都支持佢呢個講法，只係覺得有啲難聽咁解。至於公眾人物有無言論自由呢樣野，遲啲補多篇文，今日主要就係借題發揮。
識人好過識字，可以有兩個角度去睇，一個係譚生講嘅人際網絡，另一個就係「識人」所鍛鍊到嘅技巧。我見有人話譚生嘅講法反映香港依家價值觀係靠關係走後門，但我相信呢樣野唔止係香港獨有。兩年前就有4位來自哈佛同史丹福嘅教授做左個研究，登左喺《自然》（Nature）期刊*，就係用黎論證識人好過識字。個研究追蹤左7200萬個美國人嘅FACEBOOK，睇下佢地ADD嘅朋友、郵遞區號(睇你住邊，就好似連登仔問人廚房幾大咁），同埋讀咩大學等等，基本上涵蓋左84% 25到44歲嘅美國人。如果涵蓋咁多人你都覺我無代表性，咁都好難再搵個研究更加有代表性喇。
個研究結論話，如果本身父母係戴教授幅GIF講嘅仆街**，只要你喺一個容易識到有錢人嘅社區成長，你未來嘅收入平均會多兩成。由此可見，孟母$3000係幾咁有道理，孟母本人亦都相當偉大。咁如果你話居住環境已經未必咁易改到，仲有無方法呢？了解左個研究嘅道理之後，大家可以對呢件事加啲操作嘅。例如話返下教會，有啲教會係咩階層嘅教友都有，都係一個好地方俾小朋友識啲有錢朋友。咁如果無信仰，都可以俾小朋友參加啲團隊運動，打下排球、踢下足球，可以識多啲人。至於劍擊呢啲，你本身有錢先去玩啦，所以江旻憓去玩係好合理嘅；雖然佢都識到譚志源。
頭先就講到識人好啦，咁識字呢？根據返個研究，啲教授發現學校嘅品質對小朋友將來嘅向上流動影響好細，直頭可以話無乜用。如果大膽啲講，直頭可以話「識字無用」，講「識人好過識字」已經算係厚道喇。
以上就係人際網絡嘅講法，直頭係有學術根據，跟住就講講識人會鍛鍊到嘅技巧——社交技巧。當然呢個世界好需要識字嘅技術人員，你交遊廣闊周圍識人都唔會自動識得控制核反應堆，一陣爆左就唔係幾好啦。但係二戰之後嘅世界比較和平，亦都繁榮穩定左好多，需要嘅工作（特別係賺得錢多）好多都係帶有合作、銷售性質。所以喺依家呢個環境天然地對I人唔係咁友善，E人就發達喇；同時亦都益左一堆正能量嘅正能樣***，畢竟成日放腐係好難同你合作。不過就算你唔係正能樣都唔需要灰心，只不過可能係活喺一個發揮唔到嘅時代啫，咁唔係你嘅錯，係時代、係世界嘅錯。
anyway，除非你嘅工作好依靠技術，如果唔係就多數依靠合作，亦即係社交技巧。社交技巧我唔敢講話一定無得學，即係溝女都有人開班教PUA；但係我相信除左天生社交高手，大部份人都係靠累積經驗去改進社交技巧。工多藝熟，就好似我咁，由細鳩噏到大，累積多年經驗，chuishuiability都有返咁上下。所以咁講，識人就係訓練緊將來嘅職場技巧，始終個世界太和平，大部份嘅高收入嘅工作都係對人多過對事，唔識待人接物係好輸蝕。
絕大部份工作都靠技術同靠合作，但係一定會偏是但一邊。今時今日嘅工作偏合作嗰邊多，咪識人好過識字囉。不過又咁講，完全唔識字或者識好少字，咁又好難識人嘅，階級高你好多嘅人，唔通識你係貪你乜都唔識？所以講到最尾，喺識人同識字之間，最緊要都係提升自己價值****。
*參考呢篇報道 https://www.businessweekly.com.tw/international/blog/3010371
**當然，戴教授無講過啲咁嘅野；呢個就係網絡嘅威力
***樣係日文黎，讀SAMA，係敬畏嘅稱呼，大人或者殿下嘅意思
****最好梗係細細個就識定啲有錢朋友啦，小朋友純真啲，唔會講咁多價值嘛；但我呢度suppose唔係寫俾小朋友睇，我梗係要咁寫啦！
Hengor's BLOG 