大市短評20240812
原諒上面期指幅圖比較亂，主要係要睇黑色條線。條黑線係由今年低位開始計嘅VWAP（Volume weighted average price)。假設個市場方向主力由庄家控制，咁呢條VWAP可以話係庄家嘅成本。而上星期五，高位曾經穿過黑線但企唔穩，短暫應該都做得比較差（港股都差左幾年）。咁啱今年現貨高低平均價係17250，上星期五高位就係17252。
以前喺直播節目講過嘅LQD/GOVT指標都開始改善返。如果有人唔知係咩黎，我就喺度解一解。LQD同GOVT都係ETF黎，前者係公司債後者係國債，所以理論上GOVT轉做TLT嗰啲都可以。由於呢兩隻都係債嘅ETF，如果聯儲局加減息，理論上呢兩隻ETF都會同一方向移動。但係由於一隻係公司債另一隻係國債，風險唔同，公司債要考慮埋公司營運，所以我就將兩隻ETF相除（再做多少少加工），咁剩返低就係市場對風險嘅睇法，消除左令兩者同方向行動嘅因素。
所以無錯嘞，話得呢個指標改善，即係早排呢個指標係負嘅，就係7月19號轉嘅，當日標普500收5504.99。然後到上星期五8月9號收5344.15，個指標轉返綠色。
不如咁，我每日都update呢個指標，咁我就唔使每日諗短評寫乜。同埋咁樣肯定唔會同其他人撞，呢個指標係我嘅創作，第度無。不過大家注意，只作參考，唔係買賣建議，因為個指標可以發來發去。
私伙野都拎埋出黎，今日就唔講太多了。聽日再見！
Hengor's BLOG 