大市短評20240809
隨住新申領失業救濟金人數回落，個市又話無咁驚衰退嘞，然後啲野又彈返啲上去，呢啲就係所謂總經盤，專炒總體經濟macroeconomy。於是我尋日出左個facebook post，我照搬埋過黎。
「依家又話少左人新申領失業救濟金
都話玩下手又話就業市場無事，打風做唔到野啫，又唔衰退喇
就係咁
淡起上黎又伊朗炸以色列，又結束倒掛，又烏克蘭反攻俄羅斯，又Sahm’s rule，又日元拆倉（下刪一萬字）
一個唔該又話就業市場仍然強勁，少左人新申領失業救濟金，個期貨好似唔記得左前面啲野咁
唔係話一陣唔可以跌返
而係話我地要分到邊啲因素係影響長中短
短嗰啲真係任佢玩，不如望返啲技術分析好過
影響深遠嗰啲先有意思
不過要點樣分邊啲係短中長都唔係容易」
早幾日我無睇得好淡同短中長分類有啲關係，所以今日想講講呢樣野；結果今日都唔太係短評，似一啲方法分享多啲。
先講超長，呢個最簡單，以decades去計，你只能夠樂觀。點解？一世人有幾多個十年？如果啲問題一個十年解決唔到，兩個、三個總會解決到，好似60年代美元危機，70年代滯脹，去到80年代都要復甦。咁如果三四五六個十年都解決唔到呢？咁你樂觀或者悲觀都殊途同歸啦，都係一齊世界末日啫。即係話呢個係期望值問題，樂觀咁去投資點都比起悲觀地唔投資優勝，而呢樣野吹脹地係數學。
至於短中長，日月年，好難有個明確界線去睇邊個因素影響啲乜，只可以越係短就越受投機、炒賣、庄家因素左右，越係長就越受公司價值左右。短到講即日同幾日情況嘅，我地策略王觀眾大把高手，例如係睇期權倉位。呢啲短線嘅睇法，由於同炒賣、庄家嗰啲因素有關，所以技術分析比較有用。我呢幾日唔睇得太淡，除非恒指跌穿166或者USDJPY跌穿142，就係同吸派、威科夫、Point of control呢啲技術分析理論有關。順帶一提，呢啲分析唔一定要識得多，我建議大家如果要學，就學啲同Volume有關嘅技術分析，好似VWAP、POINT OF CONTROL、威科夫WYCKOFF。
至於長少少嘅，就要回歸返公司嘅本質。咩係公司？公司即係三五成群，呢個要用英文COMPANY去理解。以前荷蘭東印度公司嗰啲就係覺得自己做事太高風險，所以想夾埋一齊做，大家就合股去做，利潤齊齊分，風險都齊齊承擔。咁咩係公司價值？用返荷蘭東印度公司做例子，個價值就係間公司獲得資源嘅能力。古代嘅公司聯群結黨去打啲殖民地返黎，有原材料有奴隸有市場，越高武力就越有獲得資源嘅能力。現代公司文明有禮好多，除左食人係用刀叉之外，仍地獲取資源嘅方法通常係提供商品同服務去換錢。
講真，啱啱嗰段講嘅其實係常識，我諗好多人睇嘅時候會覺得我講嘅啱得黎好廢，咁點解要講？就係因為平時99.9%嘅評論或者新聞都會跳過左「公司價值係獲利能力」呢部份，結果大眾對股市嘅睇法會變得玄學化左。咩係玄學化？例如，師傅叫你今年（甲辰年）喺屋嘅東南偏東放一隻白玉石龍龜，叼住錢向住睡房方向*，咁你就可以化煞氣兼提升財運嘞。點解呢？唔好問，總之個因果關係就係「因為你擺左龍龜，所以你賺多左錢」。講返股市嘅例子，就變左係中東打仗或者烏克蘭反攻俄羅斯，然後話股市要避險所以跌。但，其實點解呢？
事實上，除非場戰爭打到黎本土，如果唔係，近呢幾十年啲打仗新聞有幾可真係持續影響大市？甚至係恐怖襲擊或者天災，無論係911定311，你會見到個市係插一插，但之後升返晒；兩年前都有俄烏戰爭，但你睇美股呢兩年表現？即使係俄股，其實都升返唔少，睇下面月線圖，整體表現仲好過恒指，問你死未！所以無論係咩新聞都好，我地都要諗返個重要問題，呢樣野如何影響公司獲利能力？息口變化呢啲總經野係有影響嘅，例如影響公司利息支出、影響社會消費能力（現代公司獲利方式多數都係靠消費者）等。衰唔衰退都影響公司獲利能力，衰退就可能令消費者減少消費，亦都令消費者留多左錢去還債，繼而成個社會去槓桿（整體上少左貨幣），公司更難獲利。
所以呢幾日嘅野，咩戰爭我就比較少理，總經黎講我就望返住衰退同USDJPY。而講到衰退，咁就要思考，係唔係真係衰退呀？我認為有呢個潛力嘅，信用卡消費又少左，拖欠信用卡還款超過90日嘅又創左疫情之後高位。但係失業率要喺無颶風影響嘅情況下上升，咁先算係真警號；風會打完，啲人會返返工家嘛。
anyway，總結一下，越短線越睇技術分析，越長越睇公司獲利能力。最長？咁就被迫樂觀，正所謂in the long run, we are all dead.
*呢個又真係今年甲辰年嘅風水招數
Hengor's BLOG 