大市短評20240807
今日真係要寫得短啲，如果唔係就用太多時間。
目前見到標普500穩定返啲，我都維持返原判，我覺得真正大冧應該未到。唔知點解，美股呢下畀到2017年港股嘅感覺我。港股去到2018年2月見歷史高位33484，但係未到之前，2017年12月喺3萬幾點隊過2000點落黎，嗰陣都好多人以為玩完，然後就夾多5000點上Historic high。唔係話次次一樣，只係感覺似。
當然，持相反意見嘅可以話，今次美國真係有衰退風險。我認同呀，失業率觸發左薩姆規則SAHM’S RULE，兩年期同十年期國債又結束倒掛，連新屋銷售都連跌兩個月，好多因素都指向衰退。但點解直覺覺得依家未係直接散嘅時候？我會加啲政治因素落去睇，雖然拜登唔連任，但係民主黨正路都想保住總統個位或者眾議院同啲州長，所以啲問題無理由臨尾先黎爆。選舉完左，贏左然後爆，你吹我唔脹；輸左然後爆，一來害下家，二來中期選舉又可以捲土重來。眼白白睇住經濟喺呢一刻爆，似乎唔係太合理，除非你覺得美國政府已經無晒招數。
再加上，SAHM’S RULE係咪已經觸發左呢？如果下個月非農條數又話無事，咁呢個警號算唔算誤鳴？唔好忘記，早排颶風侵襲的確令職位少左，短暫由天災引起嘅失業率上升未必真係代表經濟已經無得救。如果黎緊有任何一場戰爭有停火跡象＊，咁又可能形成夾淡嘅原因。當然，唔係話一定有，只係唔排除，所以唔適宜現階段追淡。尋日講完，美股都叫彈返啲，係港股無啫；不過又咁講，港股都無日股嗰啲跌得咁狼，因為成年都無得升。
啲野唔係一成不變嘅咁又，我諗睇住USDJPY=142呢個位，守就其他資產都暫時無野。我都仲係睇淡成個2025，今年應該仲可以「偷著樂」。
＊暗殺哈尼亞係拜登見完內塔尼亞胡先落手，會唔會美國有啲咩plan呢？好可能有，但具體係乜就真係唔知，但拜登應該知，除非佢唔記得左！
Hengor's BLOG 