隨筆20240807
話說尋日做直播時，見有觀眾留言話唔好跟車太貼，以免炒車。咁我又覺得做人唔好怕炒車，亦唔好針對其他人所謂炒車。點解呢？
北大校長胡適講過一句名言「有幾分證據，說幾分話」，我認為呢句係我地做評論嘅要記住嘅準則。好多時，受限於資訊，人無可能對一件事做出完美判斷。但係唔係因為咁，我地就要怕炒車，咩判斷都唔做呢？的確可以係咁，個人選擇而言；但做左判斷嘅係唔係就錯呢？
先唔好講政治上嘅炒車，既然上有愛因斯坦幅圖，就拎物理學黎講。到左今日，主流都認同光速係宇宙最高速度，喺宏觀角度，愛因斯坦嗰套相對論先係準確嘅。咁嘅話，你會唔會話牛頓炒左車？到今時今日，好多微觀現象都展現出隨機性，似乎量子力學先係正確嘅，咁你又會唔會話經典力學最後嘅掌門人愛因斯坦炒車？喺唔同情況下，牛頓同愛因斯坦嘅力學都有解釋同預測能力，咁又點計？
所以我覺得胡適句說話偉大之處就係，最緊要我所講嘅說話係證據帶畀我，咁就唔存在炒唔炒車；有新證據我咪改變個睇法囉。以往可能有啲數據攞唔到、無工具無技術去測量；但係依家有，咁咪擁抱新發現囉。如果因應目前證據去預測，然後出錯，咁樣都係相當有意義，咁你先可以審視返究竟係個框架有問題，定係有新證據出現？但係咩都話怕炒車，你唔會審視到任何野，你最終只會望住個結果去描述個結果，咁有咩用？都可能有嘅，但你就做唔到事前部署；所以我會比較喜歡預測完之後去修正。
總之有幾分證據說幾分話，呢個講法無壞嘅，好多時大家就係要提早做決定嘛。例如話個市升晒上去，或者跌晒落黎，你判斷到佢係升市定跌市喇，但除左唔炒車之外，你無得益架喎。所以與其話唔好炒車，不如係鑽研一套功夫，令自己嘅判斷分析框架準確啲，或者令自己搵證據搵得叻啲。鞭人屍笑人炒車，或者自己完全唔炒車，咁都係無利可圖的。建議大家相信胡適嘅說話。
Hengor's BLOG 