大市短評20240806
真正第一篇，希望大家睇完唔好見笑！
寫呢個blog有幾個原因：
- 寫喺facebook隨時俾人block，然後咩都無晒
- 開市前做少少功課，都輔助自己思考嘅
- 試試培養返個紀律
- 做下內容營銷，寫下PPLI、保險、傳承嗰類內容
- 貢獻下自己，如果寫左啲文章大家喜歡嘅，希望大家課下金，文字有價
- 平時做節目如果覺得講嘅野好聽，都希望課下金，講野有價，直頭有代價！
Anyway，言歸正傳。短評就真係短嘅，一陣個disclaimer可能仲長。
呢幾日暴跌大家應該都知咩事，不過我都唔爭在寫埋一份，因為都係自己功課。主因我認為三個：
- 日央行加息，令日元急升
- 美國可能陷入衰退，要硬著陸嘞
- 股神菲比斯＊減持一半AAPL，手上現金又破紀錄
關於1，大家知道呢種情況就會觸發拆倉。舉例，當USDJPY=160時，你借入1億日元，即係USD625,000；但係當USDJPY升值去到140，你嘅債務就變成USD714,285。而呢個金融市場玩嘅當然唔會淨係一億yen咁少，追起孖展上黎就個個爭先恐後咁沽貨套現。咁所謂沽貨套現係沽咩貨呢？咁就要問返本身借呢舊錢係買乜，本身貪日元息平，所以借日元買股票，咁買日股就沽日股，買美股就沽美股；甚至有借過黎炒加密貨幣嘅，連crypto都要沽–岔開一講，我之前話齋，crypto爆應該唔易爆去其他市場，但其他市場爆就應該會蔓延去crypto。
咁今次加息同上次加息都係加，點解上次無咁大鑊呢？我諗就係因為今次配合埋另外兩個因素，所謂完美風暴。7月底聯儲局議息按兵不動，預左，但係主席鮑威爾講嘅說話基本上係話俾大家知9月減硬；與此同時日央行就加息，即係一邊加一邊減，息差肯定收窄。再加上最新嘅非農報告出爐，美國失業率繼續升，觸發Sahm’s rule＊＊，市場就吹風要緊急減息，或者一減要減半厘，咁日美息差就再窄啲。仲有，人人都會睇住股神做乜，就好似睇住真．契媽佩洛西做乜咁，股神第二季沽走一半AAPL喎，手頭上嘅現金又破紀錄，莫非佢恐懼緊？咁大家仲點敢貪婪？
但我睇呢轉未必直落股災，我依然睇出年先杰撻撻。首先，上面貼嘅圖係DXY美元指數同USDJPY，兩者都似係定一定。
呢度見到日經都係定返一定，當然都唔排除死貓彈。但最緊要係USDJPY回返上年年尾成交密集區域（DXY同日經都係）之後有力，隻yen開始有人沽返，最恐慌情況可能已過，除非有新衝擊再踩返幾腳落去。但係我地審視返上面嘅3個下跌主因，1就當然唔好啦，但正如剛剛講，似係喘定，隻YEN唔再急升就當解除左1呢個風險。至於2，我地要考慮嘅係個警鐘有無誤鳴？唔好忘記，早排美國有颶風吹襲，有好多散工會無左，所以失業率可能係勁左，但有無勁咁多呢？可能無。一陣下個月非農失業率又跌返，咁今個月沽貨嘅咪傻仔？拿，市場係買預期嘅，預期到呢樣野，就會有人偷步入返啲貨，所以次次跌市都會有人買貨–廢話黎嘅，有人賣就梗係有人買先成交。
至於3，我都話睇出年先死嘅，所以股神咁做梗係有佢原因。所以睇野要定個timeframe，我前面話睇返好外圍，都係講得短；而超長線睇嘅係人類、技術發展，咁就永遠向好啦。所以時機好重要，短中長都受唔同因素影響。
講兩句港股。我相信本身都無乜人會借日元炒港股咁大膽，所以拆倉跌都唔係好關港股事，不過都襯熱鬧跌埋一份咁解。之前我講過16630，5/8最低16441，守住16439。暫時唔跌穿16439都唔追淡住，可能又係要磨一輪。或者上返17樓。
寫寫下都太長，修正下，下次試下短返啲先。
＊我知係巴菲特，但叫股神做菲比斯就當然係有典故，歡迎GOOGLE完再留言話我知
＊＊定義係美國三個月失業率移動平均數，減過去一年最低位，如果超過0.5%，根據過去數據係100%出現衰退，即係無得軟著陸
Hengor's BLOG 